Een claer ende doorluchtich vertooch van d'Alckmaersche kerckelicke gheschillen
(1611)–Adolphus Venator–
AuteursrechtvrijDe achthiende verthooningh.Tectander, en Onpartydich hert, met tvvee Ouderlingen.
Tectander.
O droeve daghen, o droeve uren;
Die ick nu daghelijcks hier moet besuren:
Want claghen ende trueren is nu mijn spijs,
Och: is dit kercken doen, is dit Kercken advijs?
Och: is dit noch een werck van Leeraers wijs?
Yemant te dwinghen, te zijn verbonden,
Te onderteeckenen, en leeren menschen vonden,
Een mensch'lijck boecxken, van menschen self ghedicht,
Sal dat nu wesen der sielen licht?
Ick meynde Godes Woort waer ons Lanteerne, Ga naar margenoot+
Daer alle goe Leeraers by blyven gheerne,
Die anders doen dat zijn huerlinghen al.
Onpartydich hert.
Tectander, God groet u, hebdy eenich misval?
Want ghy (na u aenschijn) zijt vol droefheden.
Tectander.
U Onpartydich hert, ick danck niet sonder reden,
Ick ben nu vol droefheyt, vol smart en pijn,
En ten can u oock niet onbekent zijn,
Hoe mijn confraters met my gaen handelen.
Onpartydich hert.
Niet sekers weet ick; maer soo ick gingh wandelen,
Eer-gister avont wesende laten,
Raeckten ick by twee van u partyen te praten
Die seyden my dat u om overspel,
Het preken was verboden snel,
Daer na heb ick van anderen vernomen,
Dat ghy gheboeleert hebt als d' onvromen
By menichte van Vrouwen, rijck ende arm:
Maer om de ghene die maken sulck allarm,
Haer in u onderganck te seer verblyen,
Soo docht my dattet waren uwe partyen,
En daerom cond' ick niet ghelooven sulcken part.
Tectander.
| |
[Folio 35v]
| |
Salich zijt ghy, o Onpartydich hert,
Die met Liefde verselt, niet lichtelick ghelooft
t' Quaet van u naesten, maer veel liever verdooft
Ws naesten fauten, tot allen stonden;
Daerom sal ick u de waerheyt verconden,
Wat het Classis met my al heeft ghedaen.
Sy begeerden als voren, met spytighen vermaen,
Dat ick den Catechismum soud' onderschryven,
Als t' merch van Gods Woort, hoort wat bedryven:
Maer neen, ick wilde blyven by Godes Woort alleen,
Dat wild' ick onderteeckenen en anders gheen,
Als ghenoechsaem wesende t' onser saken:
Dit was haer niet ghenoech, sy ginghen 't wraken,
En hebben my daerom ghesuspendeert.
Hier af heb ick een acte van haer begheert,
Door dien sy selfs ront uyt beleden,
Dat sy voor desen tijt gheen ander reden,
(Als t' gheen voor seyt is, wisten te segghen siet)
Maer sy en wilden my gheen schrift gheven niet:
Waer uyt ick gheen vreuchd' conde suyghen,
Dan voort uytgaende, vont ick daer twee ghetuyghen,
Met dese twee oud' Broeders gingh ick in,
In comende vraechden ick haren sin,
En wat d' oorsaecke was, van alsulcke suspentie.
Sy spraken weder, en gaven die sententie,
Als dat het om den Catechismum was,
En dat sy anders niet, daer voor dat pas,
Op my en hadden, voortaen te segghen,
Dit ging ick in kennis van tuyghen legghen,
Die sulcks voor den Notaris hebben bekent.
Dus is de saeck gheloopen af ten ent,
En op dat ghy moocht weten dat het waer is:
Ga naar margenoot+ Siet daer ist schrift vanden Notaris.
Onpartydich hert.
Ick sie wel dat het claer is // als ghy vertelt;
Dies is my niet als leughenen vermelt,
Van alle die partydighe knapen:
Maer wat isser toch van 't oneerlijcke byslapen,
Daer de stadt vol van is aen elcken cant?
Tectander.
Dat sal met alle leughens verstuyven oock als zant:
Sy hebben toe-ghemaeckt, het is wel waer, twee mannen,
Waer door sy meynen my te verbannen,
Heel uyt de gratie van alle menschen:
| |
[Folio 36r]
| |
Het schijnt dat dese Mannen wel souden wenschen,
Dat ick met haer Vrouwen had gheboeleert,
Op dat ick en haer Vrouwen soud' zijn onteert,
En sy van hare Vrouwen dan zijn ontslaghen,
En de Kercke van my, nae haer behaghen:
Maer alle hare laghen // en loose list,
Sal noch vergaen ghelijck de mist:
Maer hiet op gist // sy gaen my noch blameren,
En weygh'ren my voor' t recht te accuseeren:
T' is verd' daer van, datmen my deed' punitie.
Oft daerom zijn gheset, van mijn Offitie:
Maer om den Catechismum van Heydelbergh,
Van Gods Woort het suyv're merch,
Ben ick van mynen dienst aldus versteken.
Onpartydich hert.
Maer suldy hoorsaem zijn, en t' avond oock niet preken?
Want het is doch u beurte soo ick verstae.
Tectander.
Ick meen t' avont te preken, soo sonder schae,
Oft eenighe beroert, het mach gheschieden:
Want Burghermeesters my sulcks niet en verbieden,
Dien ick om sulcks heb raet ghevraecht,
En de Vroetschap sal morghen zijn verdaecht;
Wat stemmen sy hier over sullen gheven,
Sullen wy hooren, soo wy dan leven:
Dits bidt den Heere, o Onpartydich hert!
Dat God doch wil versoeten der vromen smert:
Want ist dat ick van haer moet blyven t' onder,
Soo sal het menich gheven groot wonder,
Alsulcken donder, salder als dan door dringhen,
En soo sullense met de Neutralen omspringhen:
Maer ick moet nae de Kerck, want het is tijt.
Onpartydich hert.
Wel goe'n avont Tectander, God make u verblijt.
Eerste Ouderlingh.
Wel Tectander, wy hooren dat ghy wilt preken coen.
Tectander.
Het is soo Mannen, dat meyn ick oock te doen.
Tweede Ouderlingh.
Tectander wildy niet ghehoorsamen den Classen?
Noch op haren besluyt dan gheensins passen?
| |
[Folio 36v]
| |
Tectander.
Neen ick, want gy en wilt niet laten,
t' Gheen u verboden is, met seer clare Mandaten,
Van onse Heeren Staten, hier generael.
Eerste Ouderlingh.
Wy bidden u vriend'lijck, doet nae t' verhael,
Van 't Heylighe Classi, en haer bevel.
Tectander.
Ick sal 't niet laten, t' Classis is self rebel,
En teghen God, en teghen hare Heeren.
Tweede Ouderlingh.
Soo ist dat wy dan protesteren,
Van weghen het Heyl'ghe Classi bequaem,
Dat ghy onwillich zijt, ende onghehoorsaem
Haer Heylighe gheboden, ende besluyten goet,
En niemant vanden Kerckenraet, dit sy u vroet,
En sullen u Predicatie hooren.
Tectander.
Dit heb ick al ghedacht wel van te vooren;
Dan doch daer sullen toehoorders zijn ghenoech,
Die my seer geerne hooren, laet ende vroech,
Daer in en heb ick gheen beswaren.
Eerste Ouderlingh.
Ga naar margenoot+ Wel nu Tectander, siet hoe ghy dan sult varen.
Tectander.
Al sonder beswaren // wil ick gaen voort,
En preecken Godes Heylighe suyv're Woort;
Ga naar margenoot+ Hoe 't my dan sal vergaen, wil ick verwachten:
Want God en laet den vromen niet versmachten.
|
|