Een claer ende doorluchtich vertooch van d'Alckmaersche kerckelicke gheschillen
(1611)–Adolphus Venator–
AuteursrechtvrijDe seventhiende verthooningh.Onpartydich hert, Jan wiel, ende Goossen.
Onpartydich hert.
Goeden avont Jan wiel, en God wil u bewaren.
Ian wiel.
Ick wensch u t' selve Vrient, God wil u besparen.
Onpartydich hert.
Maer Vrient, hoe ist ghevaren, maket my vroet,
Onder de Predicanten?
Ian VViel.
Al wel en goet.
Ick heb goe moet // t' sal nu wel lucken:
Want Tectander is om zijn boeven stucken,
Oft overspel van zynen dienst versteken.
Onpartydich hert.
Wat seghdy daer Jan wiel? Wat hoor ick u nu spreken?
Op alsulcke ghebreken // en heb ick noyt ghegist.
Goossen.
Jae t' is langhe gheleden dat ick wel wist
Van zyne hoerery, overspel, schelmery.
Onpartydich hert.
Wel isset waer, al t' gheen dat ghy
Hier van hem seght? soo segh ick vry,
Dat ick sulcken sentency van herten pryse.
Want Paulus gaet ons in zijn Brieven wysen,
Dat self onstraffelijck moet wesen een Leeraer.
Goossen.
Ick en heb noyt ghetwyfelt, noch voor, noch naer,
Of God soude hem in sonden laten vallen.
Ian Wiel.
Dit heeftmen wel ghenoech ghemerckt aen allen,
Die onse kerck oyt onghehoorsaem waren.
Onpartydich hert.
Al wat ghy seght hoor ick verclaren:
Maer oft is waer, is m' onbekent.
Ian VViel.
Wat meyndy datmen u leughens voorwent?
| |
[Folio 34v]
| |
Oft ghy zijt blent // een partye der Kercken,
Die aen Tectander gheen feyl en cont mercken;
En souden wy daerom gheen waerheydt connen spreken?
Onpartydich hert.
Ghy cont wel: maer ghy zijt so vol nydighe treken,
Dat wie eens u ghebreken // maer wederstaet,
Van dien suldy versieren voort alle quaet:
Want gh' ongheluckich zijt van waer te segghen:
Daer zydy voor bekent, in leughens uyt te legghen,
En zydy gheen leer-Kinders, maer Meesters fijn;
Oock en moghender gheen meerder partyen zijn,
Van God en Godes Kerck om die te quellen,
Als dierghelijcke haet-nydighe ghesellen,
Die Schapen om de Vellen, nu weyden gaen,
En die haer Menschen vonden wat teghen staen,
Vervolghen sy dan saen // in alle wijcken:
Daerom sal ickt ghelooven, alst claer sal blijcken:
Ga naar margenoot+ Want vol loose pracktijcken // is Kercken doen.
Ian Wiel.
Hy is al mee gheleert op Tectanders fatsoen,
Niet licht te ghelooven der Kercken reden.
Goossen.
Soo zijn alle Neutralen, vol boefsche zeden,
Sy achten op ons Kercke niet altemael.
Ian VViel.
Daerom behoort gheen Christen, te zijn Neutrael,
Soo Warhiel leert in alle plecken;
Al souder oock een Crijgh noch om verwecken,
Wy willen ons heel strecken, na Kercks advijs.
Goossen.
Der Kercken macht wort Tectander nu wijs,
Hoe seer hyse voor henen ginghe verachten,
En al die hem aenhanghen, sullen nu druck verpachten:
Maer wy verwachten // nu vreughd' en rust:
Want den stuck schelms en had nerghens in lust,
Dan om ons Kercke te bestryden,
Daer wy nochtans claerlijck belyden,
Dat onse Kerck niet en can dolen.
Ick woude dat de Son scheen onder zyne zolen:
Want den fielt heeft my menichmael bedroeft.
Ian wiel.
T' sal nu wel gaen, nu 't snoo gheboeft,
Van haren dienst nu is verstooten;
Waerom wy ons nu willen blooten,
| |
[Folio 35r]
| |
Van alle droefheyt ende cruys:
Maer Goossen het wort laet, ick gaen nae Huys.
Goossen.
Wel gaen wy tsamen soo vrienden pleghen.
|
|