Spiegel historiael. Voortzetting vierde partie [alleen brontekst]
(1998)–Lodewijk van Velthem–
Auteursrechtelijk beschermd[Fragment 11] | |
[pagina 530]
| |
(C. XXXVII).Dat in rade doe uinc, dat die gone
Die deken in liet comen na tgone,
Ende met pinen georlovede das,
20[regelnummer]
Dat hem daer geleent was
Een outhaer, dat daer besiden stoet,
Daer men onser Vrouwen fierter up moet
Setten, sal soe daer binnen staen.
Entie coopmans quamen gegaen
25[regelnummer]
Some, die oec hadden gewesen
Te Wincestre ende gehort van desen
Fiertre miraclen harde scone.
Deser vele quamen na tgone
Ende offerden onser Vrouwen teren.
30[regelnummer]
Dus volgheden hem vele andre heren.
Ende als die deken dit heift vernomen,
Es hi te gonen lieden comen,
Die metten fiertre waren comen daer,
Ende deedse uter kerken daer naer,
35[regelnummer]
Daer si hare paerde ende haer gewaden
Jammerlike moesten begaden,
Want het reynde ende was quaet weder.
Dus voeren si vort ende weder,
Dat si niewer conden gewinnen
40[regelnummer]
Herberghe, so vul was die stat binnen
Van coopmans die daer vergadert waren.
Dus quamen si tere vrouwe gevaren,
Die haers ontfaeremde, ende seide zaen
Tote haren man: ‘Laet ons ontfaen
45[regelnummer]
Dese liede in onse woninghe,
Die wi gemaect hebben niewinghe’,
Ende thant verhuerd was
Coopmans. Nochtan na das
Ontfinc soe daer in die Moeder ons Heren
50[regelnummer]
Ende hare clerke met groter eren,
In manieren, dat sie daer na
Des ander daghes, alsic versta,
Ene ander herberghe souden souken zaen.
Aldus sijn si daer ontfaen,
55[regelnummer]
Die van reyne ende van coude grot
Bina waren uptie doot.
Dat goede wijf hare cleder wiesch
Van der meudre, ende na dies
Dede soese droghen ende wel begaden;
60[regelnummer]
Daer na dede soe met staden
Behanghen den fiertre met cleder scone
Van onser Vrouwen; daer na die gone
Opende den heren haer herberghe al,
Ende hiet mede ende beval
65[regelnummer]
Hem te dienne ende ere te doene.
Nu was daer een, na slands gewone,
Van den coopmans, die hadde daer bi
Drie clocken gehanghen, omme dat hi
Die daer vercopen wille also,
70[regelnummer]
In enen solrebalke ho,
In een groot huus, daer hi ter stede
Dese luden ginc wel gereide;
Ende alse sine gesellen vernamen
Die clocken luden, quamen si tsamen
| |
[pagina 531]
| |
75[regelnummer]
Alle gelopen daer waert;
Ende als die gone geware waerd,
Dat sine gesellen versamet waren,
Ginc hi hem daer openbaren,
Hoe den fiertre ende hare clerke
80[regelnummer]
Die deken stac uut sire kerke,
Ende oec geboot om dese dinghe,
Dat niemen van hem ter kerke ginghe,
Maer ginghen ten huse, daer onse Vrouwe
In ware, ende daer elc bescauwe
85[regelnummer]
Ende hore daer den dienst van hare.
Int ende worden si alle daer nare
Eendrachtich up ene peyne zaen,
Ware yemen ter kerke ghesien gaen,
Dat hi V d. sculdich ware
90[regelnummer]
Den gesellen te gevene dare.
Dit was tsaterdaghes vor doctave
Van Pentecoste, daer ic scrive ave.
| |
(C. XXXVIII).Die weerd, daer onse Vrouwe was,
Hadde een huus niet verre van das,
Daer hi ossen ende beesten voedde,
Die een arm dorpman hoedde,
5[regelnummer]
Die hadde een clene dochterkijn,
Dat oec van der geboorten sijn
Hadde enen voet, als men ons leert,
Die voren dat achter was gekeert,
Also dattie teen, die voren staen,
10[regelnummer]
An die versen waren gegaen.
Dese dranc waters genoech,
Daer men die reliquien in dwoech,
Ende bespersde den voet daer na,
Ende waecte, alsic versta,
15[regelnummer]
Ene nacht der fiertren bi.
Smorghens was genesen si.
Des ander daghes quam een drake
Uter zee, die met onghemake
Dede leven menighen ter stat;
20[regelnummer]
Want vlamme ende vier voer ute dat.
Dese vlooch ter kerken waert
Ende verberende die ter vaert.
Dat was terste dat hi dede.
Daer na verbernedi ander huse mede
25[regelnummer]
Metter vlamme, die hem ginc uut
Tsire neuse; groot geluut
Ward ghinder. Dit was omtrent
Wel enen halven pas na tghent,
Van daer onse Vrauwe was ontfaen.
30[regelnummer]
Daer na senden die liede zaen
Tote onser Vrouwen boden, godweet,
Dat si brochten wel gereet
Haer fierter om staen te staden
Der bernender port. Zaen beraden
35[regelnummer]
Worden die van Lodine daer,
Ende met vroeden lieden vorwaer
Senden si up paerde met haesten grot
Dat helichdom, daer die noot
Groot was van genen drake,
40[regelnummer]
Daer so groot af was die sake
Dat onghelovelic te segne es,
So grot so lanc, so ongetes,
Met V hoveden onghehier,
Daer ute vlooch vlamme ende vier
45[regelnummer]
Sulferachtich ten nesegaten,
Ende vlooch van straten te straten,
Ende verbernede die huse alle.
Die kerke was worden so te walle,
Dat daer ne bleef stoc no steen
50[regelnummer]
Van al den mure over een,
Hen ward verbernt tasschen dare,
Stene, houte entie outhare,
So dat niemen mochte sijn vroet,
| |
[pagina 532]
| |
Dat daer noyt kerke stoet.
55[regelnummer]
Die deken sach die kerke borren
Ende sijn huus oec sijn in porren
Ende metten viere ontsteken daer.
Sine cleder ende sine allame vorwaer
Ende alle sine sconede mede
60[regelnummer]
Dedi binden daer ter stede,
Ende deed draghen te scepe waert
In die zee met snelre vaert,
Daer soe naest was geleghen.
Doe dit te scepe was ghedreghen,
65[regelnummer]
Entie scipman dit hadde ontfaen,
So quam die drake also zaen
Daer waert gevloghen, als of hi wrake
Up tscip doen wilde omme die sake;
Ende omme des dekens goet dat ontfaen
70[regelnummer]
Hadde, verbernet also zaen
Met alden goede tote in den gront.
Dit wonder en wart noyt cont,
Dat een scip int water mochte soe
Verbernen alset dede doe.
75[regelnummer]
Des werds huus ende oec mede
Al sijn goet ende al sine clenede,
Ende oec dat huus, daer in was
Sine beesten, als ict las,
Die bleven behoet van desen viere
80[regelnummer]
Ende van den drake onghehiere,
Entie coopmans sijn oec ontladen
Die onser Vrauwen ere daden,
So dat si lettel ofte niet
Van haren goede hadden verdriet
85[regelnummer]
Ofte scade, die te telne was.
Entie deken, die ghinder na das
Comen was in zwaer verdriet,
Om datti uter kerken stiet
Onser Vrouwen fiertre ende hare gewade,
90[regelnummer]
Bepeinsdem doe, al waest te spade,
Ende wilde sine penitencie ontfaen,
Ende quam wullin ende baervoet gegaen,
Ende viel ter erden vor hare mede,
Ende begonde lien daer ter stede
95[regelnummer]
Vor den fiertre, dat ware Gods recht.
Dus kendi hem mesdadich echt,
Ende bat om absolveren daer zaen
Van datti daer an hadde mesdaen.
| |
(C. XXXIX).Tote Excesteren in ere stede
Ontfincse in groter waerdichede,
Den fiertre van Lodine, secgic u,
Die choerbiscop Robrecht, die vor nu
5[regelnummer]
Lanc te Lodine woende binnen.
Dese horde, als wi bekinnen,
Daer van meester Anselme menige lesse.
Het worden oec daer X ende sesse
Zieke genesen ende al gesont.
10[regelnummer]
Daer was oec in der selver stont
War . . inghe . . . . te . . . sene daer
Enen biscop weit weit vor waer,
Die wesen soude te Salebiere.
Hieromme ne wilde die goedertiere,
15[regelnummer]
Die Moeder Gods, daer niemen genesen,
Die in dat bisdom soude wesen.
Daer na quamen si van Salebiere
Tote enen cloestre van nonnen sciere,
Die men Wiltona hiet bi namen,
20[regelnummer]
Ende al daer die boden vernamen
| |
[pagina 533]
| |
Waer een graf was gewiset daer na,
Daer in lach die priester Beda,
Die men in omelien seghet.
Bi sinen grave was geleghet
........
|
|