Spiegel historiael. Voortzetting vierde partie [alleen brontekst]
(1998)–Lodewijk van Velthem–
Auteursrechtelijk beschermd
[pagina 526]
| |
Doent II jaer hadde geweest
Sonder paus, alsomen leest,
5[regelnummer]
So wert gecoren van cardinalen,
Met concente, met gemeenre talen,
Mijn her Sinnebaut, die na das
Innocencius de vierde geheeten was.
Na sinen core dede hi te hant
10[regelnummer]
Die cardinale, die in menech lant
Waren ende niet en dorsten comen
Dor Vrederike, also ghi hebt vernomen,
Die dede hi alle comen te Romen.
Die kerken dedi hi oec begomen,
15[regelnummer]
Die van Gregorius tiden waren achter
Ende om Vrederike waren inden lachter;
Die brachte hi te haren state weder.
Dit dede hi besoeken op ende neder.
Dese paus wrachte groet wonder
20[regelnummer]
Ende dede Vrederike sere tonder,
Want hi kinde al sine dingen,
Daeromme mochte hine te bat bedwingen.
Int selve jaer wert geboren
Lodewijc van Vrankerike vercoren,
25[regelnummer]
Lodewijcs des conincs ierste sone,
Ende in dander jaer na tgone
Wert Philips geboren mede,
Sijn ander sone wel gerede.
Int selve jaer die paus met
30[regelnummer]
Heeft meester Odone geset
Kardinael te sine, ende dese was
Van Roedolfs casteele, also ict las,
Ende cancelier van Parijs mede.
Ende brueder Hugen van Thendede,
35[regelnummer]
Die prior was van den predicaren,
Dien maecte hi saen daer naren
Provinciael in Vrankerike.
Daer na quam die paus sekerlike
In Vrankerike te Lyons gereet,
40[regelnummer]
In sente Andries misse, godweet.
Daer na op sente Lucien dach
Die coninc Lodewijc te Pontisaren lach
Op sijn bedde in onmacht groot,
So dat hi sceen al doot,
45[regelnummer]
Ende sine siele wert beroert
Ende uten lichame gevoert:
Gheen lijf en scheen hi hebben daer.
Ende over ene wile daer naer
Van der onmacht hi bequam,
50[regelnummer]
Ende te hants hi tcruce nam,
Ende over see te vaerne mede.
Int selve jaer daer ter stede
So sterf meester Gautier saen,
Ende sijn brueder wert bisscop gedaen
55[regelnummer]
In sine stede te Senonensis,
Ende Odo, de bisscop van sente Denijs,
Wert erdsbisscop oec na das
Te Rethomagensen, also ict las.
Ende nu op desen tijt oec mede
60[regelnummer]
So hadde geregneert gerede
Vrederijc XXXIIII jaer.
Die sevende boec endt hier vorwaer,
Die mi te suere worden es,
Ende den achtenden, sijts gewes,
65[regelnummer]
Die de leste es van alden boeken,
Dien willic nu ondersoeken.
God onse Here moet mi gehingen,
Dat icken moete volbringen,
So dat orborlec si den lecken
70[regelnummer]
Ende den clercken oec int spreken.
|
|