Dat .lv. Capittel seyt vanden iusticien tot Tarnasseri.
ISt dat yemant eenen dootslaet, ende daer ouer gheuanghen worde, die wort oock ghedoot ghelijck tot Calcoeten. Ende van schult moetmen hebben eenich ghescrifte oft getuygenisse, haer ghescrifte maken si op papier gelijc bi ons, ende nyet op bladeren vanden boomen, ghelijc si scrijuen tot Calcoeten, ende dye luyden worden gheeyscht voor den rechter vander stadt, die hout in rechte, ende maect die rekeninge van alle sommen, Wanneer een wtlandtsche coopman daer sterft, die en mach sijn goet niet laten dien hy wille, het en si dat hi een wijf heeft oft kinderen so is die coninck sijn erfghename. Als dye coninck sterft, ende hi eenen sone achterlaet, die is na hem coninck, ende nyet na die maniere tot Calcoeten, sterft daer dan een coopman, so wort daer groot ghelt uwtghegeuen voor welrieckende cruyden om dat lichaem te balsemen ende te bewaren voor die maeyen, ende gheleyt in een drooghe houten begrauenisse, ende dat aensicht tegen Mecha ghekeert, dat is teghen den opganck der sonnen int oosten, Ende heeft hi kinderen achter ghelaten, die blijuen erfghenamen van sinen goede.
Auteursrechtvrij