Van die beroerlicke tijden in die Nederlanden en voornamelick in Ghendt 1566-1568

[p. 181]

Cap. X.

Ander oordonancie sConijncx, waer bij verboden ende gheïnterdiceert wert eenighe correspodencie oft practijcke te hauden met de rebelle, wederspannighe ende ghebannen, mitsghaders eenighe brieven, bootscappen, tijdinghen, berechtinghen, contschappen oft advertissenementen van hem te ontfanghen oft an hem te zenden, up pene van ghehauden te wesen van haer medeplichtighe, etc.

Noch wasser een ander oordinancie ghepublieert, ludende in deser mannieren:

Copie.

‘Bij den Coninc.’

‘Onsen lieven ende ghetrauwen, die president ende lieden van onsen rade in Vlaenderen, saluut ende dilectie.’

‘Alzoo de rebelle ende wederspannighe, bij vonnesse verclaert ghebannen te zijn om tfeijt van conjuracien, tdraghen van wapenen oft andersins ghecommitteert te hebben, crijm van lese Majesteit ende perduellion¹, ende voor zulcx uutgheroupen ende ghepubliceert, notoirlicken te achten zijn voor verraders ende vijanden van haren coninc, princen ende lande, ende dat men bij consequente niet en behoort eenighe antieringhe, communicatie, vriendtschap oft verstandt met hem te hauden, noch ooc den zelven eenighe jonste, hulpe oft bijstandt te bewijsen; dies nochtans niet jeghenstaende zijn wij behoorlicken onderricht, dat vele van onse onderzaten ende andere inghezetene van onse landen van haerwaertsovere, hem vervoorderen brieven ende bootschappen te ontfanghen ende zenden, berechtinghen, cont-

1 Misdaad van gekwetste majesteit.

[p. 182]

schappen ende advertissementen te doen, ende verstant ende correspondentie te houden met de voorseijde rebelle ende wederspannighe, onlancx ghebannen om de redenen voorscreven, de welcke niet en cesseren alle practijcken ende anslaghen jeghens ons, onsen staet ende de ruste vanden lande te zoucken ende voorwenden, ende lancx hoe meer doen zouden, indien daer inne niet behoorlic voorzien en werde, ende dat onder tdecsele van eenighe haer vrienden, maghen ende ghealijeerde zijn, andere om de voorleden, vriendtschap, verbintenesse, ghemeenschap ende kennesse die zij tsamen hebben ghehadt, welcke dijnghen behoorden nochtans ghepostponeert te werden, ten upziene vande obligacie daer mede de voorseijde onderzaten tonswaerts ende an de ghemeene welvaert van haer eijghen landt verbonden zijn, dies ons gheensins te lijden en staet.’

‘Zoo eijst, dat wij tzelve anghemeerct, ende willende daer inne voorzien ende remedieren, hebben bij deliberacie van onsen zeer lieven ende zeer beminden neve, ridder van onser oorden, stadthauder, gouvernuer ende capiteijn generael in onse voorseijde landen van haerwaertsovere, den hertoghe van Alve, marquiz van Coria, etc., verboden ende gheïnterdiceert, verbieden ende interdiceren allen ende een ijeghelicken, van wat state, qualiteijt, nacie, sexe oft conditie die zijn, onse onderzaten oft andere, in onse landen residerende, eenich verstant, correspondentie oft practijcke te hauden oft ghebruucken met de voorseijde rebelle, wederspannighe ende ghebannen, om de redenen boven gheroert, mitsghaders eenighe brieven, bootschappen, tijdinghen, berechtinghen, contscappen oft advertissementen van hem te ontfanghen oft an hem te zenden, noch ooc met victaillie, provande oft ghelt bij te stane, jonste, hulpe, assistentie te doen oft bewijsen, directelic oft indirectelic, in wat mannie-

[p. 183]

ren tzelve zoude moghen gheschien, up pene van ghehauden ende gheacht te werden voor haer medeplichtighe ende anhangheren, ende overzulcx metter doot ghestraft te werden, met confiscatie van ghoede, zoo verre datter ijet ware jeghens onsen dienst oft jeghens de welvaert vanden lande, ende up arbitrale pene ende boete, indien de voorseijde bootschappen, berechtinghen, contscappen oft advertissementen niet en tendeeren tot nadeel van onsen dienst ende prejudicie vanden lande, ende dat zij den principalen officier vander plaetse van huere woonstede daer van niet verwitticht oft gheadverteert en hebben, met welcken straf ende pugnitie willen wij insghelijcx ghecorregiert ende ghepugniert te worden die boden oft andere, die de voorseijde tijdinghen, brieven ende advertissementen wetens overghedraghen zullen hebben. Oordineerende voorts meer, in den ghevalle eenighe weten, waer dat de voorseijde rebelle, wederspannighe oft ghebannen in onse voorseijde landen van haerwaertsovere zijn oft hem onthauden, dat zij de zelve vanghen ende antasten, indient doenlic zij, des neen, die secretelicken der justicie anbrijnghen ende te kennen gheven, om ghevanghen ende ghestraft te worden naer de vorme ende inhauden van haren ban. Daer en boven willen wij ende bevelen bij desen, allen ende een ijeghelicken, die weten oft verstaen zullen, jeghen ons, onsen dienst, twelvaren ende ruste van onse voorseijde landen van haerwaerstovere, ijet ghedaen oft ghepractiseert te zijne, dat zij daer af terstont de wete doen aen den principalen officier vander plaetse van huere residentie, om onsen voornoemden neve den hertoghe van Alve daer van te onderrichten ende adverteren, up pene jeghens de ghene die hem daer inne niet en zouden behoorlic ghequeten hebben, van zulcke pugnitie, tzij metter doot oft ander extraordinarijse, als de

[p. 184]

zake verheeschen ende tbedroch ende tquaet vanden overtreders, verdienen zal. Ende ten hende dat van onse jeghenwoordich verbodt, oordinantie ende bevel, niemant ignorancie en zoude moghen pretenderen, zoo ontbieden ende bevelen wij u wel eernstelicken, dat ghij terstont ende zonder vertreck, tinhauden van desen doet condighen, uutroupen ende publiceren, alomme binnen den steden ende plaetsen van onsen lande ende ghraefschepe van Vlaenderen, daer men ghewonelic es uutroupinghen ende publicacien te doene, ende tot onderhaudenesse ende observacie vande pointen ende artijckelen daer inne beghrepen, procedeert ende doet procederen jeghen den overtreders ende ongheoorsame, in der voughen ende mannieren boven verclaert, dies te doene met diesser ancleeft, gheven wij u vulcommen macht, auctoriteijt ende sonderlinghe bevel; ontbieden ende bevelen allen ende een ijeghelicken, dat zij u, tzelve doende, eernstelicken verstaen ende obedieren; want ons alzoo belieft.’

‘Ghegheven in onser stadt van Bruessele, onder onsen contrezeghel hier up ghedruct in placcate, den xxvj^en dach van junio xv^c lxviij.’

Onder stont ghescreven: Bij den Coninc in zijnen rade, ende gheteekent: D'Overloepe.

Tijpis Gijsleni Manilij.

Ende was ghedruct als de voorghaende ende vercocht bij Jan Van den Steene boucvercooper te Ghendt, wonende bij Sente Pharahilden plaetse, cum gratia et previlegio, gheteekent: De Langhe.