Van die beroerlicke tijden in die Nederlanden en voornamelick in Ghendt 1566-1568

Cap. XVII.

Van eenen heesch van ghelde vanden duuck Dalve, ende van een colacie te Ghendt ghehaulen ter zelver causen, ende om de tachterheijt vander stadt te verlichtene, ende wat resolucie dat daerup ghevallen es.

Up den xxi^en maij, vrindach wesende, bracht meester Joos Borluut, eerste pencionaris bij der Kuere, zeker lettren in walsche, vanden duuck Dalve, bij schepenen van Ghedeele, inhaudende hoe dat hij begheerde te hebben up dlandt van Vlaenderen drij hondert ende xl duijsent ghuldenen, in minderinghe van zulcke somme als hij heesschen zoude, ende dat mense halen of lichten zoude te freete, om daer mede te betalen de gharnisoenen ende volck van wapenen, ter bewaernesse van dese landen, welcke somme hij zoude laten afcurten ende betalen vander

[p. 85]

sevencie¹, ende badt, dat mijn heeren schepenen van Ghedeele zouden willen overcommen tsanderdaechs bij der Kuere, ende helpen advijseren bij wat middele, ter minste quetse, men dees pennijnghen vercrijghen zoude, om daer naer bij die notable daerup een colacie ghehauden te werden. Mijn heeren van Ghedeele (alwaer ic doe diende²) docht beter, dat men dese pennijnghen liever zoude bij vercoopijnghe van renten uplichten, dan te freete, om den ghrooten oncost vanden croose te schuwene. Niet min daer was ghezeijt, dat elck daerup delibereren zoude tot tsanderdaechs den xxij^en der voornoemder maent, up welcken dach schepenen van Ghedeele overghijnghen bij schepenen vander Kuere, aldaer de zake met meer ander communiquierende.

Daer naer tsmaendaechs den xxiiij^en in meije wast colacie, ende die notable verghaerden in ghoeden ghetale, ten ontbieden van schepenen vander Kuere, naer costume, ende meester Joos Borluut voornoumt dede de propositie, te kennen ghevende de begheerte van den hertoghe van Halve, makende een langhe ratilee³, vermanende ooc of men niet en zoude connen vercrijghen den stuver indifferentelic up den wijn alnoch te continueren twee jaren of twee jaren en alf, zoo dat daer inne mochten contribueren de gheestelicke persoonen ende dheeren vanden Rade ende alle die vrij van assijse waren; want daer noch een ghroote somme tachterstont, bij obligacien tAndtweerpen upghelicht, waer af tfreet noch liep, ter causen vande soldaten, die de stadt upghenomen hadde ter bewaernesse vanden

1 Subventie, hulpgeld.

2 In 1568 was Marcus Van Vaernewyk, 6^e schepen van Gedeele.

3 Rede?

[p. 86]

inzetenen, in deerste foele, als men ghebroken hadde, in welcke foele die gheestelicke meest in perijckel waren; welc freet oft crois emmertoes upghegheten hadde tproffijt, dat den voornoumden stuver inneghebrocht hadde, ende bleef noch de stede belast int voornoumde freet ende tprincipael van dien, duer diveersche oncosten noch daer af dependerende, ende waert bijaldien dat den voornoumden stuver noch gheprolonguiert werde, zoo hoopten zij daer mede de obligacien ende tfreet van dien te lossen ende quijten. Hier up waren de notable gheheeten vertrecken ende haer advijs tot schepenen waerts over te bringhen, naer costume. Schepenen van Ghedeele, die nu ghezeten hadden bij schepenen vander Kuere, vertrocken in haer camere ende dander notable in de vertreck camere, ende eenen tijt lanck gheadviseert hebbende tot naer den xj hueren, zoo quammer eenen secretaris vander Kuere bij schepenen van Ghedeele ghevrach doen, of haer beliefde te commen in haer ghewonelicke plaetse, dat welcke zij ghedaen hebbende, zijn de notable ghevolcht, ende den meesten voijs was, up deerste point consernerende de gheheeschte somme vanden duuck Dalve, dat men hem de zelve accorderen zoude, maer dat men die pennijnghen zoude zoucken ter minste quetse van croise up te brijnghen, ende niet eer tcrois in te ghane dan teenen zekeren ghenoumden tijt. Ende nopende den ij^en pointen, vanden stuver up den wijn te prolonguieren indifferentelic up vrije ende onvrije, begheerden dat men tzelve an de gheestelicke ende heeren vanden Rade zoude willen verzoucken, ende hemlien daer toe induceren, waert moghelic, dat neen, dat ment tHove vervolghen zoude, om die stede uut haer lasten te moghen gheraken, recommanderende met eenen, dat men zoude willen vervolghen dat tservicium vande Spaensche soldaten zoude moghen ghevonden werden

[p. 87]

up de generaliteijt vanden lande, waer up meester Joos Boorluut in andtwoorden ghaf, als dat schepenen daer inne niet negligent en waren, maer hadden eenpaerlic daeromme ghesolluciteert, zoo zij alnoch deden, haudende te dier ende ander causen, alnoch haer ghedeputeerde te Bruessel ligghende, hopende troost te hebben; want die van Brabant ende andere ooc soluciteerden om hare ghelijcke oncosten ooc up de generaliteijt van haren lande te moghen vinden, dwelck geschepen was met eenen duer te ghane, zoowel vanden eenen als vanden anderen, zoo den duuck ghenouch verclaert hadde, ende aldus mijn heeren bedanct zijnde, zoo zijn zij elc int zijne vertrocken.