Van die beroerlicke tijden in die Nederlanden en voornamelick in Ghendt 1566-1568

Cap. XXI.

Wat men zeijde vander execusie, die men doen zoude; ende van beede de zonen Maijaerts, hoe zij de vlucht namen; van Onser Vrauwendach in maerte; hoe Bartholomeus Van den Putte ghevanghen was; ende hoe men zeijde, dat men up den xxx^en marcij anno lxvij groote justicie zoude doen.

De mare ghijnck ooc secretelic, datmer zeer curts justicie doen zoude, daer groote bloetsturtinghe af ghebueren zoude; want, zoo sommighe consultanten haer hadden laten ontvlieghen, daer zouder wel twee duijsent ende vijf hondert steerven oft gheexecuteert werden in alle dese Nederlanden, ende zoude meest al up eenen dach gheschien, zoo zij som up eenen nacht, te weten den nacht naer den vastenavont, ghevanghen waren.

Lucas ende Jaques Maeijaert, rijcke jonghers, wel tot lx ponden groeten tsjaers elck bezittende, onder eerfgront ende anders, (welck ghoet haer vadere, Bauwen Maeijaert, al meest ghewonnen hadde metter practijcke bij den raet van Vlaenderen, alwaer hij eene vande principale advocaten was) waren noch up den vastenavont laetstleden, bij haer vriendekins ende kennesse recreëerende, maer nu (eijlacen!) hoorende dat mer al vast vijnck ende spande, zijn oock vertrocken in schippersabijten ghecleet, ende namen haer zusters zoo compasselic an hemlien oorlof met weenenden ooghen, dattet eenen steen deeren mocht. De jonghers

[p. 301]

was den moet zoo vul, dat zij niet en wisten wat bedrijven; zij waren van sommighe ghemeerct buten te lande daert te doene was, dat zij twee of drijmael wech gheghaen waren ende keerden telcken duer eenen anderen wech wederomme; tzij of dat zij uut grooter bedwelmtheijt alzoo doolden, tzij om dat zij van haer zusters ende vriendekins niet wel ghescheeden en conden.

Item up Onser Liever Vrauwendach, die quam sdonderdaechs in dalfvasten weke (want den bisscop van Doornicke en wilden niet verlegghen, hoewel dattet zeer de Ghendtsche maerct schaedde; want den woonsdach te voren haddet ooc cleen maerct gheweest, zoo dattet maer twee daghen, dats vrindach ende zaterdach, maerct was van allerande ghoet), doe was ghevanghen Bartholomeus Van den Putte, apotecaris in de Burchstrate, up thoucxkin vander Nieuwer strate, die men heet de Abrahamstrate, om dat daer eenen Abraham zijnen zone onthoofdende voor een huus ghemaect was, te weten voor thuus dat meester Pauwels, schoolmeester, hadde doen maken, alwaer hij in plach te wonen. Desen Bartholomeus voornoemt was een curt dicke man, met eenen breeden aenzichte ende baert, ende was mijn cosijn van mijns vaders weghen, van verren. Hij quam eenen dach of twee te voren in mijn ghemoet ende wij groetten melcanderen, lettel wetende (eijlacen!) wat hem nakende was; want hij hadde te Bruessel gheweest, daer hij ontboden was, ende was wederomme ghezonden met eenen beslotenen brief, meenende dat hij zijn zake al claer hadde, maer eijlacen! theeft hem faute ghesleghen. Daer wasser noch vele, die ooc met besloten brieven wederomme ghezonden waren, maer quamen ten quaden hende.

Up den xxix^en in maerte voornoemt, smaendaechs naer dalfvasten weke, ende een caut bijtende weder van winde

[p. 302]

uuten Noort Oosten wesende, quamen zware tijdinghen te Ghendt ende eldere, te weten, als dat men tsanderdaechs zoude justicie doen over de ghuesen, al Vlaenderen duere, ende dat tvonnesse vanden duuck Dalve ghecommen was. Overzulcx waren up den noene, schepenen, als zij ghescheen waren, wederomme doen vergharen ende waren oock bij den meester del campo, ende oock waren ontrent den avonde den onderbaliu van Ghendt ende Gheeraert Rijm, baliu van Sente Pieters, die men naemt den souverain, zien ghaen int sausselet, der stede vanghenesse.