Emblemata aliquot selectiora amatoria

[p. A4r]

In Amores Ab Othone Vaenio delineatos,

CVm primum patrio visa est e gurgite Cypris

Tollere fessa caput rore fluentis aquae,

Qualis erat, talem venienti reddidit aevo,

Et secum jussit vivere Coa manus.

Paulatim niveae cedebant corpore guttae,

Iurares tremulum surgere semper opus.

Laeva videbatur lymphis illudere palma.

Stringebat tenues altera palma sinus.

Doctior Ottonis tot dextera pinxit Amores,

Quot gemitus & quot gaudia nutrit Amor.

[p. A4v]

 

Armati pharetris occurrunt undique Divi,

 

Attollunt rigidas, sed sine luce, faces.

 

Et quamvis maneant, geminas librantur in alas,

 

Et nil cum noceant, spicula saeva gerunt.

 

Si fas est, Venus ipsa tuo concedit honori,

 

Iam toties nati cuspide laesa sui.

 

Si fas est, similes, Vaeni, speramus Amores,

 

Saevius armatos, & magis innocuos.

Danieli Heinsivs