Psalmen Davidis

in Nederlandischer sangs-ryme

Ghebedt voor der bekentenisse.

O Almachtige eewige God ende bermhertige vader, ⁺ die du door dynes heylighen propheten mondt betuyget hebst, du willest niet den doidt des sundaers, mer meer dat hy sich bekeere ende leue: die du oock dynen eenichgeboren Sone niet voor de recht-

+ Esek.18.32,

[fol. 40r]

uerdigen, dan voor de sundaers hebst steruen laten willen: op dat de gene, die sich door last der sunden beswaert ende bekummert vunden, mit gantsen misztrauwen hueresselues, alléene door dat betrauwen op dynen Sone, to dyner ghenaden troin huere toeulucht nemen souden. Sie, wy syn hier in desseluen dynes Soons Iesu Christi onses Heeren name to samen ghekomen, dat wy voor dy onse sunden belyden, ende om vergiffenisse der seluen, door den name desseluen dynes Soons, voor dy bidden, So bidde wy dy oetmoedeliken o allerbarmhertichste vader, wil vorierst onser aller herten, door dynen heylighen Gheest erwecken, dat wy onse sunden warafteliken erkennen mogen. Daerna oock insunderheyt, dat herte onses gheuallen broeders N. dat hy onuerhindert syne schuldt bekennen moge, ter eeren dynes heyligen names, ende ter stichtinghe deser dyner Ghemeynte: ende wyll hem syne ende ons onser aller schuldt ende sunden, om dynes Soons willen genadeliken vergeuen, wil ons oock alle tosamen, van nu vordan, also

[fol. 40v]

mit dinen Gheest regeeren ende stercken, dat (hoewel wy sonder sunde niet syn konnen) wy nochtans in sodane sunden niet vallen, dardoor dyn weerde name ghelastert ende dyne gemeynte verergert werden soude. Uerlosz ons, o Heere God van sodanen sunden: bewysz dyne godtlike kracht in onser swackheit, tegen dat geweldt der sunden in ons, dat wy mit heylicheit ende gerechticheit dat ghenaderycke dynes soons Christi Iesu vorderen mogen Amen.