Logo DBNL
Psalmen Davidis (1566)

Psalmen Davidis

(1566)–Jan Utenhove–rechtenstatus Auteursrechtvrij

in Nederlandischer sangs-ryme


Vorige Volgende

Een andere forme des ghebedes des sondaghes voor der predike.

O Eewighe Godt ende allerghenadichste hemelsche vader, wy veroetmoedighen ons van herten voor dyner hoogher Maiesteyt, ende bekennen ongheueynstlicken, + dat so du na heysche dyner gherechtigheyt, mit ons te rechte gaen woudest, wy anders niet, voor onse verdienste, dan den eewighen doidt te verwachten hadden. Want beneuen dat wy altemale, + door de erfsunde voor dy onreyn ende kinder des toornes syn, ontfanghen wt sundliken sade ende in ongherechtigheyt gheboren, + waerdoor allerleye boise lusten, die teghen dy ende onsen euen

naesten stryden, + in ons woinen: So hebbe wy noch daadtliken dyne gheboden, menichmaael, ia alwech sonder ophouden ouerghetreden, naghelaten dat du ons gheboden, ende ghedaen, dat du ons verboden hebst. Wy syn als schapen, + dwalende gegaen, ende hebben ons hoige teghen dy besundiget, dat wy nu mit leedigen herte voor dy bekennen. Ia wy beliden to onser verkleyninghe, + ende ter verheffinghe dyner groiter barmherticheyt teghen ons, dat onser sunden meer in ghetale is, dan haer onses hoifdes: + ende dat wy thien duysend ponde schuldich syn, daer wy nietes teghen te betalen hebben. + Derhaluen wy oock niet werdt syn, onsen oigen na dy ten hemel op te slane, onse ghebeden dy voor te draghen, + veel weynigher dat wy dyne kinder heeten souden. + Dannoch o goedighe Godt ende barmhertighe vader, dewyle wy door dynes propheten mondt berichtet syn, du willest niet der sundaers doidt, mer dat sy sich bekeeren ende leuen: ende dat dyne barmherticheyt, die du den ghenen toeseghst, die sich to dy bekeeren,

sonder mate ende oneyndtlick is, + So kome wy tot dy, op dat vertrauwen, dat wy door de verdienste dynes ghelieueden Soons ende onses middelaers Iesu Christi (die dat lam Godes is, + dat der wereld sunden draeght) to dyner goedicheyt hebben ende bidden dy, Du willest onser erbarmen ende medelyden hebben mit onser kranckheyt: ende ons, omme desseluen dynes Soons Iesu Christi willen alle onse sunden ghenadeliken vergheuen. + Wassche ons in den bade synes bloodes, + dat wy reyn werden decke onse bloitheyt mit syner onschuldt ende gherechticheyt. Neem van onser verstandtenisse wech alle blendtheyt ende van onsen herten allen wreuel, moedtwille ende halszstarckheyt. + Open te deser stondt onsen mondt, ende veruulle en mit dyner erkentenisse ende wysheyt, dat wy dyn heylich woordt, recht ende vrymoedichliken wtkundigen. Bereyd onser aller herten, dat wy datseluige vlytighen hooren, bescheydentliken verstaen ende trauwliken ende vruchtbaerliken bewaren. + Schryf na dyner toesage dyn heylich ghesette in de tafelen onser herten, ende geef ons

lust ende kracht daerinne te wandelen ter grootmakinghe dynes allerheylichsten namens, ende stichtinge onses euen naestens ende dyner Ghemeynte. Dit altemael bidde wy van dy, allerbarmhertichste hemelsche vader, in name dynes lieuen Soons onses.Heeren ende heylandes Iesu Christi, ende singen wt gronde onses herten. O Godt die du onse vader bist. etc,


Vorige Volgende