Logo DBNL
Psalmen Davidis (1566)

Psalmen Davidis

(1566)–Jan Utenhove–rechtenstatus Auteursrechtvrij

in Nederlandischer sangs-ryme


Vorige Volgende

Ghebedt nader predike voor alle noiden der Christenheit.

O Almachtighe hemelsche ende barmhertighe vader, die du na dynen welgheuallen ende door dyne oneindtlike goedicheyt ons onder anderen, van der onwetenheyt, duysternisse ende Romischer afgoderien, door openbaringe dyner heyligher warheyt ghenadichliken verlosset hebst, wy bidden dy oetmoedighliken, du willest ons door dynes Gheestes kracht by onsen waren geloiue altydt erhouden, ende onse leuen dar na mit Christliken ernste totten einde toe vthuoeren laten, +

Wy bidden dy oock allerheilighste vader, voor dyne algemeine Christlike kercke, de gantse wereldt ouer, die van des Romischen Antichristes gruwelen gereyniget, sich alleene ande salige leere dynes sons Iesu Christi houdt: weere van huer alle onnut-

te heirden, + valsche leeres ende huerlinghen, ende besette se mit godtsalighen, trauwen ende vlytigen arbeiders, die niet huere, dan alleene dyne eere ende dyner gemeinte stichtinge soeken:

+ Wil oock alle koningen, heeren, vorsten, regenten ende ouerheiden, dyner gemeinte na dyner toesage, to voesterheeren ende ammen gegeuen, mit godtliker wysseit, vorsichticheit, ende gelucksalighen rade genadichliken begauen, dat sy huerer hoiger beroepinge, godtsalichliken mit Christliker bescheidenheyt ende vrymoedicheyt nakomen: sich niet heeren dan dieners dynes wordes ende volckes bewysen: ende van aller wereldtliker pracht, hoigmoedt, eergiericheit, ongerechticheit, wreedtheit, ende allen vleeschliken lusten affstaen: + op dat dyne Christlike religie onder hueren dienste in aller puerheit ende onuerualschtheyt erhouden: alle valsche leere, afgoderie ende onrechte godesdienst, door bequame middelen gedempet ende geweret: ende alle heilicheit, gerechticheit éerbarheit, sampt christliker liefde end eenicheit, to wege gebracht werde.

+ In besundere bidde wy allergenadighste vader, voor den gemeinen welstandt deses rykes van Engelandt, ende voor alle regenten, ouerheiden end amptluyden desseluigen, vorneemliken voor onse G.K.M. Elizabeth, will dese dyne dienstmaget genadeliken behoeden voor allen vyanden lyues ende der sielen: ende se by saligen regimente door dyne vaderlyke goedicheyt, lange bewaren, dat sy huer volck, onder onser aller hoiuet Christo Iesu, wyszliken regere: ende wy een rustsame ende stille leuen mit aller godtsalicheit ende erlickheit onder hueren dienste door dyne genade voeren mogen? Wil huer huyszgesinde mit hueren gantsen adel, onder dyne godtlike vreese houden: ende hueren hoigen wysen koninckliken Raadt, sampt allen heeren ende ouerheiden van huer ghesettet, godtlike wysheyt ende eendrachticheit geuen, dat sy aller godsalicheit end wat recht is, nakomen, ende gemeynen vrede mit gerustheit allenthaluen in desen ryke vorderen ende handthauen mogen.

+ Wil de volcker deses rykes ende

aller landen, die du mit dynen Euangelio besocht hebst, mit dynen Geest erluchten ende begauen, dat sy dyner Propheten stemmen géerne hoiren, ende sich der leere dynes Soons Iesu Christi, mit gantsen ernste annemen: Op dat sy daerinne mit alle, godtsalicheyt dachlikes vordtgaen, end huere behoirlike gehoersamheit hueren ouerheiden mit aller eerbiedinge ende Christliker bescheidenheyt (to hueren ende der lande weluardt, ende ter kercke Christi ghemeynen stichtinge) bewysen.

+ Oock bidde wy voor dese stadt Londen, wil huere ouerheyt, Aldermannen ende den gantsen Raadt, mit dynen geest begenadighen, dat sy onder dyner heyliger vruchte huer ampt trauwliken ende vorsichtliken bedienen, ende also alle godtsalicheit, gherechticheyt, eerlickheyt, sampt ghemeynen vrede ende gherustheit, darinne vorderen ende erhauden mogen. Op dat sy also van allerleye straffen: ende plaghen, die wy dachlikes verdienen, ontslagen in allerleye ghelucksaligheyt groeyen, bloeyen, ende ste-

des toenemen moge

+ Oock bidde my dy wt gronde onses herten allergoedighste vader voor dese onse wtlandishe Gemeynte, die du voor dyne oneindtlike goedycheyt wonderbarliken hier hebst plenten end wederbringen willen wil voerdan to allen tyden, dyne ghewoinlike gunst ende barmherticheit an deselue ertoigen, dat sy van aller tyrannie ende valscher leer beuryet, dy diene in rechtschapener heylicheyt ende gherechticheyt. Op dat darouer dyn heylige name gepresen ende dat ryke dynes Soons Christi Iesu wyder wtgebreydet werde.

+ Wy bidden dy oock almechtighe goedighe Godt, voor alle koningen, vorsten, regenten, ende ouertheiden, ende volcker, die mit den Antichristischen tuymelbeker verdoiuet de stemme dynes Soones Christi Iesu noch niet hebben hoiren noch verstaen konnen: ende derhaluen door onuerstande dyn heylige warheit mit hueren trauwen tuygen, die leuende leden desseluen dynes Soons syn, viandliken veruolgen. Wil dese sampt allen anderen

die off door swackheyt verblendet, of door ketterische listicheit veruoeret syn, genadeliken to den waren licht ende ten rechten wege bringen: Op dat wy alle te samen onder den eenigen Heirde onser sielen Christo Iesu in een schapskoye versamelt, dy eendrachtigen dienen ende eeren mogen.

+ Ten lesten bidde wy voor alle onse broeders ende sustere, de gantse wyde wereldt ouer verstrowet, die vmme der warer leere ende belydenisse dynes Sons Christi Iesu, vanden Antichrist heftigen gehatet, angeuochten, swarliken bekummert ende onderdrucket werden, insunderheit die dar in banden, stocken ende swaren geuenckenissen liggen, Nemliken N. ende N. wil hen trauweliken bystaen door kracht dynes Geestes: huere herte van bouen in waren geloiue stercken, ende sodane vrymoedicheyt hen geuen, dat sy huers opgelechte cruyce duldelyken dragen, ende na bescheider ende bestendiger dynes ende dynes Soons heyligen names, belydenisse, datseluige, edt sy mit leuen of steruen (alset van dy to dyner godtliker eeren

beschicket is) heerliken wtuoeren mogen.

+ Oock bidde wy dy voor alle hulploise ende troistloise personen, weduwers, weduwen ende weesen: voor alle swangere ende kraemvrouwen, ende int ghemeine voor alle broeders ende susters die mit kranckheit, armoede, elende geuenckenisse, verbanninge of anderen ouelen, an geest of lyf, na dyner godtliker beschickinge versocht ende geoeffent werden: Wil dese in hueren iamer niet verlaten, mer hen genadelicken bystaen: huer opghelechte cruytz na dyner vaderliker barmherticheyt, of trosstliken versoeten, of hen sterckheyt ende ware Christlike geduldt geuen, dat sy de na dynen welgeuallen bestendeliken dragen ende vthuoeren mogen. Op dat sy vth hueren straffen verstaen dyne vaderlike sorge ende barmherticheit ouer se, ende dat sy ter oeffeninge hueres geloiues ende warer bekeringe ende beteringe getuchtiget werden.

+ Ten allerlesten bidde wy dy allergoedighste Godt ende hemelsche vader, wil ons geuen, dat wy van allen onghelucken, krygen, oproeren, ty-

rannie, duertyden, pestilensien ende anderen swaren plagen, door dyne ghenade ontslagen, in stilheyt ende gerustheyt, een ieder syner beroepinge, mit ernstigen vlyte nakomen, ende mit dynen genadigen ende noidigen segen van hemel, so wel to velde als to huysz vorsien ende versorget werden, Op dat wy hierwt dyne vaderlike sorge ende goedicheyt to onswerdt vernemen, ende mit kindtliker ghehoersamheyt ende toeuersicht, in stedigher verwachtinge dyner hemelschen goeder, die noch oige ghesien, noch oire ghehoirt, noch geen menschen hert ergrondet heefst, bekrafftiget werden.

Dit ende alles wat du ons noch eygentliker weetst nodich te syne an lyf of siele, bidde wy van dy allerghenadighste hemelsche vader, in name dynes lieuen Soons, onses Heeren ende middelaers Iesu Christi, mit voerhouden sodanes ghebedes, als hy ons gheleert heeft, ende spreken wt gronde onses herten. Onse vader, die du bist. etc.

Na dem de Ghemeynte op dit voorgaende ghebedt huer Amen ghesecht heeft, werdt een Psalme ghesonghen, ende sy met deser segeninghe verlaten mit eener vermaninghe ter handtreyckinge to den armen.

 

DE Heere segene v, ende behoede v: de Heere late syn anghesichte luchten ouer v, ende sy v ghenadich: De Heere heue syn aenghesichte ouer v, ende geue v vrede. Amen.


Vorige Volgende