Psalmen Davidis

in Nederlandischer sangs-ryme

Cantate Domino canticum. psalml.cxlix.

Een vermaninghe an de Ghemeynte den Heere te louen ouer syner ouerwinninghe teghen alle machten der wereldt, waerdoor den volcke der heylighen een volle beuredinghe ghepredickt werdt tot oppet eynde der wereldt.

EEn niewe ghesangk singet Godt den Heere
In der vromen saemlingh syn lof end eere:
Israel hem verhueghe deeghlick in
den schepper syn

Laet de kinders Sion ernstlick verblyden
Hen in hueren koningk oock t’ allen tyden,
Dat sy synen name met pypen reyn
Louen ghemeyn.

Dats’ hem met tromlen end harpen lof singhen
Want God’ is syn volck een beualligh dinghen,
Hy verciert de sachtmoedighen in t’ breyd

[fol. 240r]

 

Met saligheyt.

 

 

 

Met heerlicheyt sullen de vrom’ ontspringhen

 

In huer bedd’ oock ieuchen end vroeylick singhen:

 

Sy sullen God metter keel prysen fyn,

 

Sonder waenschyn.

 

 

 

Op dat sy huer koninghen binden moghen

 

Met ketenen end huer edel’ hertoghen

 

Met yseren voetbanden sterck end swaer,

 

In’t openbaer.

 

 

 

Om te doen dat gherichte Gods te deghen,

 

Als gheschreuen staet, welck daer alleweghen

 

Sal syn allen vromen tot grooter eer,

 

Louet den Heer.

Ghebedt.

§ O Heere Godt, gheef ons de ghenade, dat wy dy inder vromen versamelinghe prysen, nademael edt dyn welgheuallen gheweest is, ons in dat ghetall dyner kinder an te schryuene: ende dat wy dyne ghenaden ende seghenen bekennen moghen, die du in ons in dynen Sone Iesu Christo vermeerest, Amen.