Psalmen Davidis

in Nederlandischer sangs-ryme

Eripe me Domine. Psalm.cxl.

Dauid bidt om hulpe teghen dat gheweldt ende listen der vyande. Troistet sich, hy werdt darouer verhoort werden.

[fol. 226v]

VRy my vanden valschen mensch’, Heere,
End vanden schalcken my behoed,
Die met de syn’ in allen keere,
Quaed denck, in’t hert’ end krygh steets doet,
Sy hebben verscherpt huere tonghen.
Euen als de serpenten doen,
Als met adern fenyn behanghen,
Syn

[fol. 227r]

huer lippen end spreken koen,

Behoed my, Heer, vande wreed’ handen,
Des godloosen, bewaer myn siel
Uoor den die gheweld doet vol schanden,
Die myn ganghen verkeeren stil.
D’hoouerdigh’ hebben my verborghen,
Stricken, end hemelick bedeckt
Huer net, end valstrick, in’t verborghen,
Hier end daer hebben wtghestreckt.

Doe seyd’ ick met een vast vertrauwen,
Du bist myn God in eewigheyt
Myns biddens stemm’, o Heer vol trauwen,
Uerhoor in dyn bermhertigheyt.
Du bist, o God, almechtigh’ Heere,
De sterckte myner saligheyt,
Myns hoofds decksel ende gheweere
In tyd van krygh’ end teghenheyt.

§1 Den goodloosen wil niet ghehengen,
Dat na synen wille gheschie,
Laet hem synen will’ niet volbrenghen,
Datmen hem niet verheuen sie.
Laet t’ hoofd der ghenen die my drucken,
T’ verdriet end swarigheyt ontfaen,
Die my syn tongh, in alle stucken,

[fol. 227v]

 

Met spitsigheyt heeft aenghedaen.

 

 

 

Laet daer gloeyende kolen vallen

 

Op hen God wilse met vyer slaen:

 

End in kuylen diep doen veruallen,

 

Op dat sy nemmermeer opstaen:

 

Die niet oprecht is in syn spreken,

 

Sal op erd niet bestandigh syn,

 

Wie gheweld doet, dien sal ghebreken

 

Gheen val, gheen verdriet noch ghepyn.

 

 

 

Ick weet dat God goed recht sal wysen

 

Den ghenen die daer verdruckt is,

 

End vanden die onrecht bewysen,

 

Sal hy hem eenmael wreken friss.

 

Dynen naem sullen de gherechten

 

Prysen ghewis gaer deghelyck:

 

Uoor dyn aenschyn de vrome knechten

 

Sullen oock blyuen eewelick.

Ghebedt.

§ O eewighe Godt, sterckte onser saligheyt, verloss ons van den ghenen, die ons door huere giftige tonghe oeuel na reden: ende laet niet toe, dat sy huere boise aenslagen na huerer woediger luste vollenbringen: op dat wy eruaren de gherechtigheyt, die du teghen se bewysest, ende dy in eewigheyt bekennen eenen rechtuerdigen richter der wereldt te syne in dynen Sone onsen Heere Iesu Christo, Amen.