Psalmen Davidis

in Nederlandischer sangs-ryme

Domine clamaui. psalml.cxli.

Dauid bidt Godt om sodan een ghemoedt, dat hy der

[fol. 228r]

godtloosen, hoe groit ende machtich sy oock syn ghenade, gunste ende vriendtschap verwerpe, ende sich der ghemeinschap der vromen aenneme,

ICk roep’ ernstlick tot dy, o Heer,
wil dy tot my seer spoeden.
Myns roeps stem met dyn ooren hoor,
Nae myns herten vermoeden,
Myn ghebed sy bereyd voor dy,
Ghelyck rueck brandsel schoone,
End mynr handen opheffingh vry,
Laet oock tot dynen

[fol. 228v]

throone,
Als auond-offer wesen.

Wil eenen toom aen mynen mond,
Heer, ghenadelick setten.
Mynr lippen dore t’aller stond
Wil oock deeghlick besetten.
Neygh myn hert niet tot boosheyt doch,
Dat ick gheen boos’ aenslaghen
Doe met den goddeloosen, noch
Dat ick t’eenighen daghen
Oock van huer roofspys’ ete.

§1 De gherechte die sla my vry,
Ick wilt voor vriendschap achten:
Ende so hy beschelde my,
Als oly soet end sachte,
Die daer myn hoofd niet wonden sal:
Dies wil ick voor hen bidden,
Dat huere richters werden al
Afghestooten door midden
Der steenachtigher plaetsen.

Op dat sy hooren hoe soet sy
T’ghebed dat ick do leyden:
Onss lidtmaten die werden by
Des grafs monde ghespreyden,
Euen als een gheklouen haut,

[fol. 229r]

 

Of opghegrauen erde.

 

Mer myn oogh’, o Heer, dy aenschauwt,

 

Ick hop’ op dy met werde,

 

Laet niet vergaen myn leuen.

 

 

 

Behoed my voor den strick, o Heer,

 

Dien sy my hebben ghspannen:

 

End door dyne ghenade teer

 

Uoor den boosdadern spannen.

 

Mer schaf lieuer ghenadelick,

 

Dat de godloose menschen

 

Uallen in hueren eygnen strick,

 

Dat ick na meynen wenschen

 

Daerentusschen ontkome.

Ghebedt.

§ O Heere Godt, oorsprongk alles troostes, hoor onse ghebeden: ende schick onse herten ende tonghen also na dynen wille, dat daer wt onsen monde niet wtga, dan dat ter eeren dynes names sy: maeck ons leerafstigh end duldigh aen te nemen de vermaninghen die ons na dynen woorde ghedaen werden. Endelicken verlos ons vanden aenslaghen onser vyanden, dat huere raedslagen gewendt werden ende wy behouden, door Iesum Christum. Amen.