Psalmen Davidis

in Nederlandischer sangs-ryme

Memento domine. Psalm.cxxxii.

Dauid verhueght sich ouer der komste der arcke des verbondes to Ierusalem na der toesage die hem daeruan ghedaen was: ende is in goeder toeuersicht ouer der toelage die em Godt ghedaen hadde van den eewighen ende ghelucksaligen rycke des ghenes, die wt synen lenden gheboren soude werden.

HEer, wil Dauids ghedachtigh syn
In t’ groot verdriet, hem aenghedaen:
Die God’ eenen eedt heeft ghedaen,
Iacobs Gode

[fol. 218r]

met blyden schyn,
Heeft oock syn beloft’ aengheuaen.

Dits de beloft’ door hem gheschiedt,
Ick sal in myns huyss hut niet gaen,
End tot myn bedste niet opgaen.
Ick sal myn ooghen sluyten niet
End myn wynbrauwe niet toeslaen,

Uoor dat ick vonden hebben sal
God den Heere der heerlicheyt,
Een plaetse lustigh toebereydt,
Een hutte daermen met gheschal
Diene Iacobs God vol sterckheyt.

Sie, wy hebben nu wel ghehoort,
Dat bouen alle plaetsen dy
Ephrata d angehnaemste sy.
End hebben dyn woonst’ aen een oord
In boschuelden gheuonden bly.

Wy sullen in dyn hutten gaen,
End sullen voor de voeten dyn
Uallen, om dy t’aenbidden fyn.
Kom dan daer metter woinste saen,
Met d’aerck dynr sterckheyt, O Heer myn

[fol. 218v]

 

Laet dyn priesters bekleedt syn slecht

 

Met allerley gherechtigheyt,

 

End dyn heylghen met vroylickheyt

 

Om der wille Dauids dyns knecht

 

Wend dyns ghesalfden aenschyn niet.

 

 

 

§1 God heeft Dauidi met waerheyt.

 

Gesworen end salt houden schoon.

 

Segghende ick sal op dynen throen

 

Stellen, ia oock in eewigheyt,

 

Dyns eyghens buycks vrucht ende Soon,

 

 

 

In dien dyn kinders deghelick

 

Houden d’bond end tuyghnissen myn

 

Die ick hen noch sal leeren fyn,

 

Huer kinders sullen eewelick

 

Sitten vry op den throone dyn.

 

 

 

Want God heeft verkoren Sion,

 

End tot syn woonstede begheert.

 

Myn rust’ is daerinne bescheert:

 

Ick sal dar eewelick wonen schoon,

 

Want sy is van my steets begheert.

 

 

 

Ick salse gheneeren rycklick,

 

End huer’ aermen met spyse voen.

 

Ick sal huer priesters t’heyl aendoen,

 

End huer’ heylighe sullen sick

 

Uerblyden met verhueghing koen.

 

 

 

Daer sal ick Dauids horne doen

 

Wassen end bloeyen ieughdelick,

 

Al daer sal ick oock te ghelyck,

[fol. 219r]

 

Mynen Christo aensteken schoon

 

Een kerss die lichte deghelick.

 

 

 

Ick sal syne vianden fel

 

Bekleyden met schandlickheyt groot,

 

End maken voor huer ooghen bloot,

 

Daerop syn hoofd fyn bloeyen sal

 

Syn kroon’, oock in allen aenstoot.

Ghebedt.

§ O Heer, wil in ons een rechte begheerte planten dyns ware religie ende suyueren dienst, die door den Satan gheschonden was wederumme an te richtene, ende maeck, dat na dien wy met gherechtigheyt bekleedet syn, dat rycke dynes Soons Iesu Christi, door de predike des Euangeliums onder ons in eewicheit heuestet werde dat wy also ghenieten der goeder, die du dyne Ghemeynte toeghesecht hebst, ende sien de vyande dynes Soons ende de onse, vol schande, door dynen Sone Iesum Christum. Amen.