Psalmen Davidis

(1566)–Jan Utenhove– rechtenstatus


Sæpe expugnauerunt. Psalm.cxxix. Dauid gheeft hier te kennen. De Ghemeynte behoort sich te verhueghen, dat sy van eener iederen verdruckinghe, die huer aenghedaen werdt, verlosset sal werden: ende dat huere vyanden, niet teghenstaende hueren ydelen wane, to schande sullen werden. SY hebben my dickmael van myn ionckheyt aen Bestreden, nu Israel segghe met sinnen Sy hebben my dickmael van myn ieughet aen Bestreden, mer sy konden my niet verwinnen.
[Folio 215v]
De ploughers my hebben teeckens ingedruckt Ia mynen ruggh, ende ghemaeckt groue voren: Mer die Heer gherechtigh heeftse verdruckt, End huer seelen willen afsnyden end schueren. Dat so beschaemt end verstooten werden stracks, Die Sion met vyandtlicken haet verdrucken, Dats’ oock ghelyck werden den grase des dacks, Dat daer verdort eermen t’ selue kan gheplucken. Daer van syn handt de maeyer niet vullen kan, Noch hueren schoot die de handbussels versamen: Die daer voorby gaen wenschen gheen geluck aen […] v sy gheluck in des Heeren namen.
Ghebedt. § O Heere Godt, wil breken alle aenslaghen aller vyande dynes heylighen willen, dat sy bouen ons niet spannen, mer gheef dat wy door dyne macht ghehandthauet ende sy in huerer stoutheyt ende hoogheyt to schande werden: ende wy dyne gherechtigheyt grootmaken,, door dynen Sone onsen Heere Iesum Christum, Amen.