Psalmen Davidis

in Nederlandischer sangs-ryme

Beati omnes qui timent. Psalm.cxxviii.

Hoe men inden huywlicken staet godsalichlicken ende ghelucklicken leuen sal.

VVEl saligh is bedeghen
So wie den Heere vreest,
End wandelt in syn weghen
Recht sinnigh inden gheest.
Die arbeydt dyner handen
Sal dy wel konnen voen ,
End salt in

[fol. 214v]

allen standen
Spoedig syn in dyn doen.

Dyn wyf sal vruchtbaer wesen,
Als wynstocken vruchtbaer,
Die dynen huys’ aenkeleuen.
So sullen oock voorwaer
Dyne kinders beklyuen
In groot ghetal ghesondt,
Als planten van olyuen,
Ouer dyn tafel rondt.

So sal bespoedight wesen,
Die daer vreest den Heer mildt,
Wt Sion Godt ghepresen
Dy saligh maken wilt.
Du salt alle dyn leuen
T’ voorspoed Ierusalem
Sien, end Godt daerbeneuen
Prysen met hert end stem.

End salt wt dynen sade
Dobbel gheslachte sien
In Israel ghenade,
End vrede bouen dien.
Dy sy lof, Heer ghepresen
Uan nu in eewigheyt.
Gheef dat wy moghen wesen
Tot dynen dienst bereydt.

Ghebedt.

[fol. 215r]

§ O Heere, druck sodan eene vreese dynes namens in onse herten, dat wy ons begheuen te wandelen in dynen weghen: ende gheef ons een gheslachte, dat wy in dynen vrese onderwysen, ende sampt denseluen dy prysen in dyner Ghemeynte, door Iesum Christum, Amen.