Psalmen Davidis

in Nederlandischer sangs-ryme

Nisi Dominus ædificauerit. Psal.cxxvii.

De heylighe Gheest leert hier, aller menschen arbeydt, sonder Godt, sy vergheefs, ende dat saligh syn, die in allen dinghen op Godes handt mercken. Hier door vermaent hy de menschen, sy sullen huer vertrauwen op God setten.

VVAer Godt niet self dat huys opricht

[fol. 213r]

End al besorght daerinne,
So werdt met ons niet wtghericht,
verlorn is kracht met sinne
Alle moyt’ end sorgh vergheefs gaet.
Als s’ Heeren hulp ons niet bystaet,
All’ arbeydt werdt verloren.

Waer Godt niet self bewaert de stadt,
End bauwt toren end mueren,
Daer helpt gheen gheld noch menschen raedt,
All’ arbeyt is verloren.
Waer Godt die waeck niet self grypt aen,
Onss waken is vergheefs ghedaen,

[fol. 213v]

 

Alle konst’ end list moet falen.

 

 

 

T’ is vergheefs dat ghy vroegh opstaet,

 

Om den mondkost te winnen,

 

Of dat ghy spade slapen gaet,

 

D’ brood etende met pynen.

 

Want die Heer den die hy lief heeft,

 

De wyle sy schier slapen, gheeft

 

Sonder sorgh’ huer behoefte.

 

 

 

Des lyfs vruchten syn kinders veel

 

Uan Godt tot eener eruen,

 

Die hy tot loon gheeft wien hy wil,

 

End laet niemandt verderuen.

 

Met seghen hy alles veruult:

 

Alle noodt werdt door hem ghestilt,

 

wt rechter gnad’ end gunste.

 

 

 

Ghelyck pylen syn inder handt

 

Eens ruesen in dat stryden,

 

Gheschoten aen eenighen kant,

 

Recht voren of ter syden:

 

So syn de soons huerer ionckheyt,

 

Fyn bereydt tot sterckdadigheyt,

 

In allen hueren wesen.

 

 

 

Saligh is die daer heeft gheuult

 

Synen koker te deghen

 

Met sulcke pylen, want groot’ huldt

 

Sullens’ hebben alweghen,

 

Sy sullen niet werden beschaemt,

 

Teghen huer vyanden versaemt,

[fol. 214r]

 

In eenighen gherichte,

Ghebedt

§ O Godt, wil seghenen alle onse aenslaghen, ende maken, dat wy noch buyten noch binnen niets vornemen, dan onder dynen beleyde: op dat wy bekennen, daer ga niet van stede, sonder dyne segheninghe: ende alle onse doen door ende in dy beginnen beleyden ende voleynden om dynes Soons Iesu Christi willen. Amen.