Psalmen Davidis

in Nederlandischer sangs-ryme

Confitebor tibi. Psalm.cxi.

Dauid predickt in desen Psalme de wysheyt ende barmhertigheyt Godes, die hy in sonderheyt an dat Ioedisch volck ghebruyckt heeft.

Inder wyse des .lxvi. psalmes

ICk sal dy Heer , dancken end louen
Wt den gheheelen herte myn,
Oock heymelick end daer en bouen,
Inder vromen versamelingh.

S’Heeren wercken niet te doorgronden
Syn groot, end werden ondersocht
Uan allen den die t’ allen stonden
Daernae met lust’ hebben ghesocht.

Syn werck voorwaer aen alle syden
Is enckel lof end heerlicheyt
End syn gherechtheyt t’allen tyden
Sal blyuen ia in eewigheyt.

God die daer is gaer vol ghenaden,
Der bermhertigheyt toeghedaen,
Heeft niet willen syn wonderdaden
Ghedachteniss laten verghaen.

Den die hem steyts hebben voor ooghen,
Heeft hy gheghunt den kost des monds,
End is (door trauwigheyt bewoghen)
Ghedachtigh gheweest syns verbonds.

[fol. 186r]

 

Hy heeft daer de kracht syner wercken

 

Uerklaert synen volcke ghelieft:

 

Mits dat hy hen, tot huer verstercken,

 

Der heyden erf ghegheuen heeft

 

 

 

De wercken synr eyghener hande

 

Syn slecht waerheyt end billickheyt,

 

End gheboden alderhande

 

Syn waer end enckel vasticheyt.

 

 

 

End syn beuest op sulcker wyse,

 

Dat sy eewlick bestandigh syn:

 

Want sy syn ghemaeckt alderwyse,

 

Wt trauw’ end gherechtigheyt fyn.

 

 

 

Hy heeft synen volcke ghesonden

 

Uerlossingh end syn verbond friss

 

Gheboden t’houden t’allen stonden,

 

Wiens naem heyligh end heerlick is.

 

 

 

Gods vrees’ is der wysheyt beginne.

 

Hy gheeft allen een recht verstandt,

 

Die hen hierna richten met synne,

 

Welcker prys heeft eewighen standt.

Ghebedt.

<h> O Godt, die du wonderbaer bist in dynen wercken ende waerachtigh in dynen beloften, beuest ons meer ende meer in dyner heylighen wille, ende inder vreese dynes names, dat wy dyne gheboden houden ende dyn lof verkonden ouer der verlossinghe onser in dynen Sone Iesu Christo ghedaen. Amen.