Psalmen Davidis

in Nederlandischer sangs-ryme

Beatus vir qui timet, psal.cxii.

Dauid beschryft in desen psalme de goedicheyt ende ghedult Godes: secht ghelucksaligh te syne de gene die denseluen na volghen.

[fol. 186v]

SAligh is de man die daer leeft,
In rechter ontsicht des Heeren,
End die een welgheuallen heeft.
Aen syn gheboden end leeren,
Syn saed op erden sal krachtigh syn,
End t’ saed der vromen: d’ welck God oock fyn.
Met segheningh sal vereeren.

[fol. 187r]

 

Ryckdomen end all’ oueruloed

 

Sullen in syn huys oock wesen:

 

Syn gherechtigheyt blyuen moet

 

Hoe seer sy hier sy mispresen.

 

D’licht schynt den vromen in duysterheyt

 

Uan God, die van bermhertigheyt

 

End gnaden werdt meest ghepresen.

 

 

 

Weldadigh is de vrome man

 

Door wtleenen end gheryuen:

 

End al syn saecken hy well kan

 

Met ordeel end stichtingh dryuen.

 

Saligh is hy, want door gheen gheual

 

Beweght hy emmermeer werden sal,

 

Der vromen naem sal steyts blyuen.

 

 

 

Uan quaed gherucht dat ouerkomt,

 

Schroemt hy doch hem niet met allen:

 

Want syn hert hem vertrauwt end romt

 

Op God daer’t op is veruallen,

 

Syn herte staet vast end vreest gaer niet

 

Tot dat hy syne vyanden siet,

 

Na syn beghert’, oueruallen.

 

 

 

Hy deelt wt syn goed euen mild

 

Den aermen end den ellenden:

 

Welckes de Heer ghedencken wilt,

 

Syn gherechtheyt sal niet enden,

 

Mer inder eewigheyt blyuen staen:

 

Syn hoorn end kracht sullen voortaen

 

Hen tot grooter eeren wenden.

[fol. 187v]

 

So dat de boos’ aensiende dit,

 

Uast knerssen sal syne tanden,

 

End door enckelen haet end nydt.

 

Uerdwynen in allen standen:

 

Hy sal teghen hem veel listen slaen.

 

Mer syn begheert’ sal niet bestaen,

 

End met hem komen tot schanden.

Ghebedt.

<h> O gherechtighe ende barmhertighe Godt wil sulck eene vreese dynes names in onse herten drucken, dat wy alle onse behaghen nemen int onderhouden dyner gheboden, dat wy mit gheniete der beloften, die du ghedaen hebst den ghenen, diese onderhouden, ende anschauwen des valles aller godloosen, in eewigheyt bekennen de goedicheyt, die du an ons, ende dyne gherechtigheyt die du an se ghebruyckest. Amen.