Dauid singht vanden rycke Christi, dat daer was in Sion, ende van daer vordt komen soude tot den eynden der erden, ende achteruolghen sal, tot dat Christus alghemeynlicken aenghebeden, ende syne vyanden tot een voetbanck syner voeten ghemaeckt hebbe.
DIe Heer die heeft gheseyt tot mynen Heere,
Set dy so langh tot myner rechter hand,
Dat ick tot dyn voetbanck stell’ end vernere
Dyn vyanden, die dy doen wederstand.
[Folio 185r]
[fol. 185r]
Die Heere sal dyner kracht staf schoon senden
Seer verre van Sion oock ouer breed.
Hy sal hem met deess woorden tot dy wenden,
Hersch midden onder dyn vyanden wreed.
Dyn volck sal met gauen vry willigh wesen,
Wanneer du sal cierlick vertoonen dy:
End dyn ieughd als de dauw s’morghens dick ghresen.
Sal in dynen kindern voort komen vry.
Die Heer die heeft ghesworen met aendachte,
End het sal hem berauwen nymmermeer,
Du bist eewigh priester t’allen gheslachte
Na d’ordening melchisedec met eer.
Die Heere staet dy alweghe ter syden,
End sal dy doen in nood goed onderstand:
End in synen tooren sal hy bestryden
De Koninghen, end slaense voor de hand.
Hy sal ouer den heydenen doen wraken,
End maecken’t allom vol lichamen dood:
End de hoofden sal hy te vallen maken,
Die daer herschen ouer veel landen groot.
Hy sal ghewis wter droefsalen beken
Drincken dewyl’ hy ouer wegh sal gaen:
Daeromme sal hy oock syn hoofd opsteken,
End verheffen bouen des hemels throon.
Ghebedt.
O eewighe Godt, die du dynen eewighen Sone verordent hebst onsen koningk end Priester te syne, dat wy dy door dat offer synes lyues geheyliget wurden: maeck
[Folio 185v]
[fol. 185v]
ons deelachtigh alle syner weldaden, dat wy mit versaken onses selues, hem dienen in aller heyligheyt end ons dy opofferen gheestelick offeren die dy aenghename syn door denseluen dynen Sone Iesum Christum. Amen.
Auteursrechtvrij
