Psalmen Davidis

in Nederlandischer sangs-ryme

Paratum cor meum. Psalm.cviii.

Etlike dencken, Dauid schreef desen Psalm, als hy krygh voerde teghen de omligghende vyanden, die teghen hem ghesworen hadden. Hy vertrauwet sich op Godt, hy sal teghen syne vyanden ouerwinninghe bekomen.

MYn hert, o Godt end Heere,
Tot singhen is bereydt,
Ick sal, o myn recht’ eere,
Lof singhen met bescheydt.
Du lofsangkspel sta oppe.
End harp voll melody,
Dat ick daer

[fol. 182r]

Uroegh op kloppe.
Den dagheradt naby.

Dat ick met lof ontspringhe
Onder den volcken, Heer,
End dat ick dy lof singhe
Onder die Heydens séer.
Want dyn groote ghenade
D’ hemels te bouen gaet:
End dyn waerheyt gherade
De wolcken inder daet.

Uerhef, o Godt ende Heere,
Bouen de hemels dy:
End dyn eer meer end meere
Op erd haer toone vry,
Dat dyn lieue gherechten
Uerlost werden eenmael:
Uorloss door dyner rechten,
End help my wter quael.

Godt sprack niet te verhelen
In syn heylighdom luydt:
Ick wil Sichem bedeelen
Suchots dal meten wt.
Gilead myn ick achte,
Manasses is oock myn:
Ephraim myns hoofds krachte,
Iuda myn hoofd man fyn.

[fol. 182v]

 

Moab is myn waschketel,

 

Idumeam ick sal

 

Met myn voeten doormeten,

 

End maken bly gheschal

 

Ouer de Palestynen.

 

Wie sal beleyden my

 

In de besloten steden?

 

End tot in Edom vry?

 

 

 

Salt du niet doen, o Heere?

 

Die ons verstooten hast,

 

End woudst wtgaen niet meere

 

Met ons end ons’ heyrkracht,

 

Help ons als nu ter stonden

 

Teghen onsen vyand,

 

Want ydel werdt beuonden

 

Des menschen onderstandt.

 

 

 

Mer wy door Gods mettreden

 

Sullen schoon dinghen doen,

 

End hy sal vry vertreden

 

Onse vyanden koen.

Ghebedt.

§ O Heere, die du dy na dyner grooter goedicheyt, tot den dynen gunstich bewesen hebst, gheef ons hulpe teghen alle onderdruckers ende wederparten, dat wan wy verdruckt werden, tot dy, ende niet tot menschen, daer ghene saligheyt inne is, onsen loop nemen, ende by dien dat wy onse hope, die wy to dy hebben, niet verliesen, wy onse herte altydt bereydt hebben dy te dienen ende

[fol. 183r]

te vereren in dyner Ghemeynte in eewigheyt, door dynen Sone Iesum Christum, Amen.