Psalmen Davidis

in Nederlandischer sangs-ryme

Hier werdt voorghehouden dat officium eener Christelicker ouerheyt, hoe sy sichselues schicken sal int verwerpen der boosen ende int annemen der vromen. Waerin alle huysuaders een voorbeeldt hebben, sich daerna te draghen in hueren huyshouden.

Misericordiam & Iudicium. Psal.ci.

VAn goedheyt end gherechts
Sal ick stellen by dichte,
Heer, ick wil singhen dy,
Wysselick end van deghen
Wil ick gaen

[fol. 163r]

in dyn weghen,
Tot dat du komst tot my.

Met oprechten ghemoede
Wil ick syn op myn hoede
Te mynen huys’ eenpaer
Uan d’booss wil ick my myden,
Noch dat in ander lyden:
Want ick haet’t gants end gaer.

Alle die van dy wycken,
Hat’ ick ooc desghelycken:
So dat niet een van haer
By my sal moghen blyuen,
Die een boos ghemoed dryuen,
Die moeten oock van daer.

Ick sal oock niet bekennen,
Die hen tot schade wennen,
Die synen naesten vry
Met achterklap is schadigh,
Die sal ick onghenadigh
Uerwerpen verr van my.

Die met grootscheyt beuanghen
End hooghmoedt is behanghen
Te lyden waer my pyn.
Myn ooghe sal aenmercken
Die door t’gheloue wercken,

[fol. 163v]

 

Op dat sy by my syn

 

 

 

Die hen onnoosel draghen,

 

Welcke my wel behaghen,

 

Sullen my dienen fyn.

 

Die omgaet met bedrieghen,

 

Met spotten end met lieghen,

 

Sal in myn huyss niet syn.

 

 

 

Mer de boosdaders alle

 

Wil ick bringhen ten valle,

 

Ouer het gantse landt

 

Op dat de stadt des Heeren

 

Reyn sy, met een vermeeren

 

Gods woords aen allen kant.

Ghebedt.

§ O Heere, onder wiens, macht alle syn, die du ordineerst tot ouersten, wil also anblasen de ghene, die du tot richters ende Ouerheyt beschickest, dat sy sonder wtnemen der persoonen, de vromen hanthauen ende straffen de boosen, dat wy onder huerer bescherminghe een stille ende vreedtsaem leuen leyden na der leere dynes Soons Iesu Christi, Amen.