Psalmen Davidis

in Nederlandischer sangs-ryme

Dominus regnauit, irascantur. Psalm.xcix.

Dese Psalm verkondight de sonderlicke ghenade die God ghedaen heeft den gheslachte Abraham, wan hy en opnam hem toeghedaen te syne.

Inder wyse des .3, psalmes.

DIe Heere regneert fyn,
De volcken beroert syn,
End loopen te ghelycke:
God die Heere rechtsins,
Sitt op de Cherubins,
Oock beweeght werdt d’erdrycke.
Onss almoghender Heer,
Werdt met treflicker eer
In Sion groot beuonden:
Bouen de volcken al
Beyde groot ende smal
Uerheuen t’allen stonden.

Darmen, Heer, dynen naem
Met lofsanghe bequaem
Prys’ ouer de gants’ erde.
Want syne naem groot is,
End vreesselick ghewis,
End heyligh vol van werde.
Want daer is doch gheen dingk
Lieflicker den koningk,
Als billickheyt magh wesen,
Du heefst dat recht bereyd,

[fol. 161r]

 

End doest oock goed bescheydt

 

In Iacob wtghelesen.

 

 

 

So wilt dan te ghelyck

 

Uerhooren deghelyck

 

God onsen lieuen Heere.

 

Buyghet voor syn voetbanck

 

Uw’ knyen met eer’ end danck.

 

Want hy is heyligh seere.

 

Moses van soeter aerdt,

 

End Aaron metten baerdt

 

Syn priesters syn ghewesen,

 

Samuel groot van faem,

 

Onder den die Gods naem

 

Aenroepen, werdt bewesen.

 

 

 

Sy riepen all ghemeyn

 

Tot God den Heere reyn,

 

Doe sy daer in nood waren:

 

End na syn goedigheyt,

 

Uerhoordes’ in huer leyd,

 

End liet syn goedheyt baren.

 

Hy sprack fyn tot syn volck

 

Wten pilaer der wolck,

 

Ghenadelicker wyse.

 

Want de tuyghnissen syn

 

End syn settinghen fyn

 

Hielden sy tot Gods pryse.

 

 

 

O onse God end Héer

 

Die verhoordese teer,

[fol. 161v]

 

End ontfinghs’ in ghenade.

 

Du besochst oock met daedt,

 

End straftest huer misdaed,

 

In dyner onghenade.

 

Uerheft God onsen Heer,

 

End buyght vwe knyen séer,

 

Op synen heylghen berghe.

 

Want ons’ Heere ghewis

 

End God gaer heyligh is,

 

Ende van reyner werde.

Ghebedt.

§ O Godt, die du hebst willen dyn vendel planten in dyner Ghemeynte die du dy versaemelt hebst door dynen Sone, verhoor ons in alle onsen ghebeden, die wy dy in derseluen doen sullen, ende mit vergheuen onser feilen, buygh onse herten tot onderhoudinghe dyner Wet, dat wy dy aenghename syn ende eewelick blyuen onder dyner bescherminghe. Amen.