Psalmen Davidis

in Nederlandischer sangs-ryme

Cantate domino canticum. Psalm.xcviii.

Het is een andere vermaninghe Godt te louen, van wegen syner goedicheyt end trauwe, die hy tot syner Ghemeynte bewesen heeft, welke wel weerdt syn bekent te werden wt den onredelicken creaturen.

SInght een nieuwe ghesangk den Heere,

[fol. 159v]

Want hy heeft groot wonder ghedaen.
End door synen arm heyligh seere,
Heeft victori voor hem begaen.
D’Heer’ heeft kondt ghedaen syn saligheyt:
Door welcke wy behouden syn,
End heeft ontdeckt syn gherechtigheyt,
Oock inder Heydenen aenschyn.

Is gheweest synr goedeyt end trauwen
Tot t’huyss Israels ghedachtigh,

[fol. 160r]

 

D’erd eynden hebben konnen schauwen,

 

De saligheyt onss Gods krachtigh.

 

Ieuchet dan fyn Gode den Heere,

 

Die daer ouer t’gants’ erdryck syt,

 

Singht vroylick end verhueght v seere,

 

Singht lof alsnu end t’aller tydt.

 

 

 

Wilt op d’harpe den Heere singhen,

 

End totter harpe voeght de stem,

 

Uoor God met trompetten end klinghen,

 

Lof singhet fyn van herten tem.

 

Laet de See ruysschen desghelicken

 

Met al t’ghene datter is in.

 

Daer beneuen dat gants’ erdrycken

 

Metten ghenen die daer in syn.

 

 

 

De waterstroomen voor den Heere

 

Laet metten handen t’samen slaen.

 

Laet de berghen in allen keere

 

Ontspringhen end blyschap aenuaen.

 

Want hy komt om d’erdryck te richten,

 

End sal syn in gherechtigheyt

 

De wereld richten sonder swichten,

 

End de volcken met billickheyt.

Ghebedt.

§ O Heere die du gheropen hebst alle natien des erdryckes, ter komste dynes Sons Iesu Christi, achteruolgh altydt dyne goedertierenheyt ende gunste te onswaert, dat sich de gantse wereldt verurouwe inder verlossinghe die du ghedaen hebst in dynen Sone

[fol. 160v]

Iesu Christo onsen eenighen Salighmaker ende verlosser. Amen.