Psalmen Davidis

in Nederlandischer sangs-ryme

[fol. 158v]

Dominus regnauit, exultet. Psalm.xcvii.

Dit is een beschriuinghe der hoogher Ma. Godes, ende syner gherechtigheyt, dat de gantse wereldt sich veroedmoedighe onder hem, ende alle afgoderen afgeworpen werden. Oppet eynde werden wy vermaent, op hem te vertrauwen ende ons in hem te verurouwen,

In der wyse des .xxxix. Psalmes.

DIe Heere die regneert met heerlicheyt:
Dies laet d’erdryck vroylic syn ouerbreyd,
Laet all’ eyland vro syn met hert’ end stem.
Wolcken end duysterheyt syn rondom hem:
Gherechtigheyt end alle billickheyt
Syn de stuensels syns throons in eewigheyt.

Uoor hem een verdoende vyer daer gaen sal,
Dat verbranden sal syn vyanden al:
Syn blycksems hebben dat erdryck verlicht,
End d’erdryck is beroert door huer ghesicht.
Die berghen groot als wasch ghesmolten syn,
End t’gants’ erdryck voor des Héeren aenschyn.

D’ hemels verkonden syn gherechtigheyt,
End alle volcken sien syn heerlicheyt:
Laet beschaemt werden die beelden dienst doen,
End die hen in d’afgoden rommen koen.
Anbidt hem ghy die daer syn Enghels syt,
Dit heeft Sion ghehoort ende is verblydt.

De dochters Iuda, Héer, met grooter vrueghd
Hebben hen om dyn oordeelen verhueght.
Want du bist, Heer, ouer all’ erd’ erhooght,
Ia verr bouen alle goden verhooght.

[fol. 159r]

 

Ghy die den Heer lief hebt van herten grondt,

 

Haett de boosheyt gantselyck t’aller stondt.

 

 

 

Godt bewaert de ghene die syne syn,

 

End verlosts’ wter godloosen hand fyn.

 

D’licht is ghesaeyt den die daer syn oprecht,

 

End blyschap den die van herten syn recht:

 

Ghy oprechten in den Heer’ v verblydt,

 

End syns naems heerlicheyt ghedachtigh syt:

Ghebedt.

§ O gherechtighe ende machtighe Godt, na dien het dy behaeght heeft dat rycke dynes Soons onder ons aen te richten, maeck dat wy met gantser genegentheyt dy aenkleuen, dat wy niet beschaemt werden, als de ghene, die huer betrauwen op de doode ende stumme afgoden setten, ende dat wy door dyne ghenade verlicht, ons voegen dat quaedt te mydene, ende dat goedt te doene. Amen.