Psalmen Davidis

in Nederlandischer sangs-ryme

Qui habitat in adiutorio. Psalm.xci.

Hier beschriift Dauid de groote voorspoedigheyt ende sekerheyt der ghelouighen, ende van hoe veel quades hy beurydt sy, die in Godt vaste vertrauwet.

WIe syn vertreck neempt tot den schut
Des di’ int hooghst heeft syn wonen,
Die sal als

[fol. 150v]

in een seker hut
Onder Gods schadow wonen:
So seght hy ernstlick tot den Heer,
Godt is myn toeulucht reyne,
myn burgh myn hoop, derhaluen seer
Stuen’ ick op hem alleyne.

Want van des iaghers strick sal hy
Dy vryen end wttrecken,
Oock vander pest ’hoe swaer sy sy,
Sal hy dy schoon bedecken
Met syn vlercken: du salt vry syn
Onder syn vedern teere,
Du werdst met syn trauw bedeckt fyn
Als met een schilde end speere.

So dat du niet te vreesen heefst
Wat grousaem is by nachten:
Noch voor den pyl (so langh du leefst)

[fol. 151r]

 

Die s’daegks vlieght, dy te wachten:

 

Noch voor eenighe pest, die daer

 

In t’duyster heeft huer wesen:

 

Noch voor d’boos op den middagh klaer

 

Uerderflick opgheresen.

 

 

 

Laet vallen dy ter lincker handt

 

Duyst end thien duyst ter rechten:

 

So sal sulck iammer, schad’ end schand

 

Dy gantslick niet aenuechten:

 

Mer du salt huer verderf sien saen

 

Met dynen eyghnen ooghen,

 

End de godloosen stracks ontfaen

 

Hueren loon onbedroghen.

 

 

 

§1 Want om dat du tot den Heer réedst,

 

Du bist myn toeulucht reyne:

 

End om dat du in’t hoogh besteetst

 

Dyn hope op Godt alleyne:

 

Gheen ongheluck kan dy voortaen

 

Eenigher wys’ aennypen:

 

Gheen plaghe salder oock aenstaen,

 

Die dyn hut kan aengrypen.

 

 

 

Want hy sal synen Engheln snel

 

Beuel gheuen te deghen:

 

Dy te bewaren rechtsins wel

 

In allen dynen weghen.

 

Sy sullen op huer handen dy

 

Draghen, dat dyn voet bloote

 

Niet struyckele, noch hem onury

[fol. 151v]

 

Teghen eenen steen stoote.

 

 

 

Op luparden end slanghen fel

 

Du salt onbesorght treden:

 

Leeuwen end draken euen wel

 

Saltu schaedlooss betreden,

 

Om dat hy my lieft (spreeckt de Heer)

 

So wil ick hem beweren:

 

Ick wil syn huld syn langs so meer:

 

Want hy myn naem doet eeren,

 

 

 

Hy sal my aenroepen met vliet

 

End ick sal hem verhoiren:

 

Ick sal hem by syn in’t verdriet,

 

Hem redden end vereeren

 

Uullen sal ick met daghen veel

 

Sulckerley eenen mensche,

 

Ick sal hem oock rycklick myn heyl

 

Uertoonen t’synen wensche.

Ghebedt.

§ O Heere Godt almachtigh, die du maeckst, dat alle dinghen ten besten keeren alle den ghenen die dy lief hebben , ende die du bewaerst, de ghene die sich voegen onder dyne bescherminge, doe ons die ghenade, dat wy dy altydt aenroepen in waerheyt, dat wy verlost van allen perikelen, eyndelicken ghenieten de saligeyt die ons verworuen is, door dynen Sone Iesum Christum: Amen