Psalmen Davidis
(1566)–Jan Utenhove–
Auteursrechtvrijin Nederlandischer sangs-ryme
[Folio 152r]
| |
T’Is voorwaer een groot dinghen,
Dy fyn prysen, o Heer,
Dyn naem in allen keer,
O alder hooghst, oock singhen,
om s’ morghens vroegh te konden,
Deghelick dyn goedheyt,
End s’nachts dyn trauwigheyt,
End t’ontydigher stonden.
Op het spel van thiensnaren,
End op de soete luyt:
| |
[Folio 152v]
| |
End met s’ghesangs gheluyd,
End harpe soet van snaren.
Du heefst my verblydt Heere,
Met dynen wercken fyn,
End den handdaden dyn
My doen verhueghen seere.
Och hoe schoon syn, Heer, dyn wercken,
Die du doest elcken dagh,
Hoe diepe’ is dyn raedslagh,
Dienmen aen dy kan mercken.
Dit kan gheenssins bekennen,
De stompsinnighe man:
De dwaes kant niet verstaen,
Noch hem daertoe ghewennen.
Dat de godloose groeyen
Ghelyck het gras in t’dal,
End de boosdaders al
Uet ende lustigh bloeyen:
Op dat sy te ghelycke
Werden gants wtgheroeyt.
Mer du, Heer, blyfst end bloeyt,
Als de hooghste’ eewelicke.
§1 Want sie, Heer, dyn vyanden,
Sie, dyn haters vergaen,
Wie’t quade’ is toeghedaen,
Die werdt verstroeyt met schanden.
Mer du salt mynen hooren
Uerheffen , end my doen
| |
[Folio 153r]
| |
Gaen met den hoofde koen
In’t hoogh’ als den eenhooren.
Ick sal met oly groene
Ghesalft syn, d’ooghen myn
Sullen hueren lust sien
An myn vyanden koene:
Hooren sullen myn ooren
Ouer den die opstaen
Teghen my, end ontfaen
Boodschap die sy ghern hooren.
De gherechte sal bloeyen,
Ghelyck eene palmboom:
End als een cederboom
In Libano opgroeyen:
Ia de schoone plantsoenen
In s’Heeren huys gheplant,
In onss Gods sael plaisant,
Sullen bloeyen end groenen.
Sy sullen vruchten draghen,
End groote dinghen doen
Seer ieughdigh ende groen,
Oock in huer oude daghen:
Om trauwlick te verkonden,
Dat d’ Heer gherechtigh sy:
End myn steenrotss, dat hy
Oock sonder sond’ is vonden.
| |
Ghebedt.§ O Godt schepper hemels end der erden, gheef dat wy | |
[Folio 153v]
| |
ons also oeffenen inder aenmerckinghe dyner werken, dat die in ons wercke een gants gheestelicke vrueghde ende ons aenbringhe een rechte vruchte dyner maiesteyt Gheef oock dat wy door den voorspoedt der godloosen niet ghebracht werden, dat wy ons met hen vermenghen, mer dat wy door ansien hueres gruwelicken endes soecken stantuastigh te blyuen in dyner ghemeynte, hoe verachtelick wy daer oock schynen moghen: Op dat wy mit verkondighen dyner gherechtigheyt ende goedicheyt eyndelicken tot dy opghenomen werden door den middel dynes Soons Iesu Christi, Amen. |
|