Psalmen Davidis

in Nederlandischer sangs-ryme

Quam dilecta tabernacula. Psalm.lxxxiiii.

Dauid bewyst hier wat groote begeerte hy hadde tot den tabernakel daer de rechte Godesdienst was. Ende hoe lieflick het sy midden inder Ghemeynte Godes te syne.

HOe lieflick syn dyns tempels woonsten, Heer,
Myn siel met lust dyns huyss inganck begheert
Myn hert end vleesch syn met vruechden ont-

[fol. 140r]

sprongen
Met haest tot den leuenden Godt te komen.

De mussch end de swaluw hueren nest slecht
Gheuonden heeft, daer sy huer ionghen legt.
So lust my oock, o Godt, na dyn autaren,
O myn koningk end Heere der heyrscharen.

Saligh syn die in dyn huys wonen vry:
Eewelick vro sullen sy prysen dy.
Saligh is, wiens kracht in dy is gheleghen,
End in wiens hert beuest syn dyne weghen.

Door t’dal des drucks gaende sullen sy fyn
Altydt voorsien van schoon fonteynen syn.
Sy sullen gaen van kracht tot kracht met vreden
End sullen vry in Sion tot Godt treden.

O Heer end Godt der heyrscharen verhoort:
Myn bidden herck, Godt Iacobs, onghestoort.
Godt, die onse beschermer bist vol trauwen,
wil in d’aenschyn dyns gesalfden stracks schauwen

Want ghewislick een dagh in dyner sael
Is beter dan elders duysent te mael:
Lieuer wachtd’ ick de duer’ des huyss mins héeren
Dan dat ick wou met den boosen verkeeren.

Die Heer is my tot eener sonn’ end schildt:
Ghenad’ end eer die Heere gheuen wilt,
End syn goeden den vromen sonder rauwen,
Saligh is, Heer, die in dy sal betrauwen.

[fol. 140v]

Ghebedt.

§ O Here, op wien wy onse vertrauwen ghestelt hebben: na dien het dy gelieft heeft dyne genaden ende geestelicke segheninghen op te doene in dyner Ghemeynte, die dyn huys is: wil ons altydt handthauen door dyne genade, dat wy dy daerinne eewelick eeren ende dienen, door dynen Sone Iesum Christum. Amen.