Psalmen Davidis

in Nederlandischer sangs-ryme

Deus quis similis. Psalm.lxxxiii.

Dauid begheert bystandt van Godt teghen de onbesnedene natien, die Ierusalem, de ware Ghemeynte Godes, sochten te vernielen. Het is een recht ghebedt der Christen teghen alle tyrannen ende porten der hellen, die teghen de Ghemeynte Christi conspireren,

SWygh doch niet, Heer, O God, wil

[fol. 138v]

niet stil wesen,
Uerdraegh doch niet langher dit iammer wesen,
Want sie, dyn vyanden hen steken op,
Die dy haten verheffen hueren kop,
Teghen dyn volck listelick sy raedslaghen,
Teghen dyn eru’ hebben sy raedt gheslaghen.

Hebben gheseyt, laetse ons gantslick wtroeyen

[fol. 139r]

 

Dat sy niet meer volk syn, end niet meer bloeyen

 

Dat gheen ghewagh sy des naems Israel:

 

Gherott hebben s’end teghen dy rebel

 

Een bondt ghemaeckt Edom, d’Ismaeliten,

 

Moab, Agar, end oock de Gebaliten.

 

 

 

Ammon, end Amalech, de Palestinen,

 

Die van Tyro end Assur metten synen,

 

Den kinderen Loths hulp’ hebben ghedaen.

 

Laetse den loon met Madian ontfaen,

 

Met Sisar’ end Iabin an Kisons beken,

 

In Endor al vergaen soo’t heeft ghebleken.

 

 

 

Maeck dat all’ huer vorsten als Oreb varen,

 

Als Zeeb, Zebah, Salmana sonder sparen,

 

Die daer seyden, laet ons de woinste Gods

 

Besittten vry, als het deel onses lots,

 

Ierusalem latet ons gaer vertreden,

 

End t’gantse landt met allen synen steden.

 

 

 

O God, wils’ als een rat, onstadigh maken,

 

Als een stoppel voor den wind door dyn wraken:

 

Ghelyck een vyer dat een groot woudt verbrandt,

 

End als een vlam, die d’hooghe berghen brandt

 

Ueruolghs’ so met dynen wederwinden,

 

End verslaese met dyn harde draeywinden.

 

 

 

Huer aengesicht wil met schaemten versoecken

 

Op dat also sy dynen naem aensoecken,

 

Maeckse beschaempt, verslas’ in eewigheyt

 

Gants ongheacht, brengs’ in verdriet end leydt:

 

Op dat hen dyn naem wel bekent mach werden,

[fol. 139v]

 

End dat du bist alleen de Heer op erden.

Ghebedt.

§ O Godt, een ware ende eenich vertrooster der sondaren, sie aen dat gheweldt ende dreyghementen dyner ende onser vyanden, die daer wt syn dyne ghemeynte te vernietighen. Verdruckse, Heer, ende verstroey huere aenslagen: maeckse beschaempt ende verachtelick, ende verslase door dyne moghentheyt, dat sy bekennen dat du alleene bist, dien alle creature te vreesen ende te vereeren heeft, door dynen Sone Iesum Christum. Amen.