Psalmen Davidis

in Nederlandischer sangs-ryme

Benedixisti domine. Psalm.lxxxv.

Dauid, door den heylighen Gheest, singht ende propheteert vander toekomste Messie ende van synen gheestelicken ricke, waerinne vrede, gherechtigheyt ende waerheyt regneren souden, als Esa.11. staet. Hy bewyst oock hoe der gheloouighen sonden wegh ghenomen syn door Iesum Christum, so Daniel 9. ende Miche.7. staet, ende dat gantse nieuwe testament leert.

DYnen erdrick, Heer, gnad’ héefstu gedaen,
Du heefst Iacob vanden banden ontslaen.
Du heefst dyns volcks boosheyt genomen héen,

[fol. 141r]

Du heefst bedeckt alle de sonden fyn
Dyn gramschap heefstu begonnen te enden,
End dynen toorn van ons oock willen wenden.

Keer dy tot ons, Godt onser saligheyt:
Wend van ons af den brandt dynr toornigheyt.
Wiltu altydt teghen ons syn verstoort?
Of dynen toorn vertrecken van nu voort?
Bistu niet die ons ten leuen salt brenghen?
Waeruoor dyn volck hem in dy sal ontspringhen?

Toon ons, o Heer, dyne barmhertigheyt,
Ghenadelick gheef ons dyn saligheyt.
Hooren wil ick wat daer spreeckt die Heer mildt:
Want hy tot syn volck vrede spreken wilt:
End tot den die weldadigh syn tot allen,
Op dat sy niet tot sottigheyt veruallen.

T’ heil is voorwaer den godtureesighen by,

[fol. 141v]

 

Op dat ons die heerlicheyt wone by:

 

Gnade end waerheyt kommen hen in’t ghemoedt

 

Gherechticheyt ende vred’ hen kussen soet,

 

T’ ghelooue sal vast spruyten wter erden:

 

Gherechtheyt sal van hemel gheschauwt werden.

 

 

 

Die Heer sal oock syn goedertierenheyt

 

Gheuen seer mildt, end storten ouer breydt,

 

Onss erdryck sal syn vruchten brenghen voort

 

In oueruloedt, na onses Heeren woordt,

 

Gherechtigheyt sal voor den vromen treden,

 

End hy sal fyn ouer wegh gaen met vreden.

Ghebedt.

§ O Godt onser salicheyt, vergheef ons alle onse ouertredinghen, ende beweghe onse herten dat wy dy also vreesen, dat wy niet meer tot onser dwaesheyt keeren: gheef oock dat wy mit versaken alle onser wederspanningheyden ende boosheyden, dy gheen oorsake meer gheuen dat du bedrouet ende vertornet werdest teghen ons, ende wy also in stilheit blyuen moghen, door Iesum Christum Amen.