Psalmen Davidis

in Nederlandischer sangs-ryme

Notus in Iudaea Deus. Psalm.lxxvi.

Dit is een dancksegghinge voor dat Godt beschermt heeft syne Ghemeynte: ende in sunderheyt dat hy syne wonderbare kracht bethoont heeft teghen so stercke ende toegherustede vyanden.

GOdt is eyghelick bekent wel
End vermaert in Iudeen landt:
Syne naem is in Israel
Groot gemaeckt aen elcken kant.
Syn hutt is in Salem ter stede,
End in Sions syn woonstede.

Aldaer kan men lichtelick sien,
Wat hy heeft ghebroken in krygh:

[fol. 125v]

 

Pylen, boogh, schildt, swerdt, bouen dien

 

Oock alderhande wapentuygh.

 

Du bist vreeslicker in dyn wesen.

 

Dan roouers souden moghen wesen,

 

 

 

Die hooghmoedighe syn tot roof

 

Ghemaeckt, end slapen hueren slaep.

 

End die daer waren sterck gaer doof,

 

Hebben als nu de handen slap.

 

Uoor dynen toorn Heer is ontslapen

 

Waghen end perdt, meesters end knapen.

 

 

 

Du bist, du bist seer vreesselick,

 

Wie sal konnen bestaen voor dy,

 

So dyne toorn seer schrickelick

 

Eenmael dapper ansteken sy?

 

Uan hoogh ghehoort is dyn gherichte:

 

Dies vreese d’erd end stild’ haer lichte.

 

 

 

Doe stondt Godt op t’oordeelen fyn,

 

Om te behouden deghelick

 

Alle die daer sachtmoedich syn

 

Op erden: want s’menschen toorn dick

 

Sietmen wel ghedyen ter eeren

 

Ende pryse Godes des Heeren.

 

 

 

End du salt gorden d’ouerschot

 

Der menschen vol wtsinnigheyt.

 

Ghelooft vry den Heer uwen Godt,

 

End betaelt hem na billigheyt,

 

Ghy alle die vwe woonstede

 

Hebt rondom den Heere met vrede.

[fol. 126r]

 

Offert hem dan gheschencken schoon,

 

Die daer is gheheel schrickelick

 

Tot den die hem verachten koen,

 

Hy beneemt den gheest daghelick

 

Den princen, end staet wel te vreesen

 

Der erden vorsten met haer wesen.

Ghebedt.

§ O Heere Godt, na dien het dy ghelieft heeft dyn gheweldt openbaer an te legghene tegen de gene die to allen tyden de dyne bestreden hebben, dwing oock huyden de woedicheyt ende den wtsinnighen toorne alle der ghenen die sich teghen dyne ghemeynte verheuen: ende sta op ten gerichte recht te doene den verdruckten, op dat inder gherechtigheyt die du bewysen salt teghen die hooghe gheseten, ende inder goedicheyt die du bruycken salt tegen dyne goedertieren dienaers, wy oorsake hebben altydt op dy te hopen ende dy eewelick te louen, door dynen lieuen Sone Iesum Christum. Amen