Psalmen Davidis

in Nederlandischer sangs-ryme

Deus in adiutorium. Psal.lxx.

Dauid in grooten peryckel, bidt God om hulpe teghen syne vyanden.

[fol. 114r]

In der wyse des .v. Psalmes.

O Barmhertighe God end Heere,
Uerloss my nu, dat bidd’ ick dy,
O Heer’, om stracks te helpen my
Toef niet, na dyn ghenade teere,
Haest dy doch seere.

Laet schaemroot end tot schande komen,
Die daer na myn leuen vast staen:
Laetse beschaemt te rugghe gaen,
De ghene die my t’quade gonnen,
End t’goed’ afgonnen.

Laetse verre te rugghe wycken,
End deghelick werden beschaemt,
Die daer teghen my onbeschaemt
Roepen ha ha, somen siet blycken,
In alle wycken.

Mer laet vro syn buyten end binnen,
Alle die rechtsins soecken dy:
Laet steits segghen, d’Heer ghelooft sy,
Die dyn hulp deghelick besinnen,
End recht beminnen.

Mer ick ben arem sonder eere,
End ellendigh, haest dy tot my:
Myn hulper end verlosser vry
Bistu, end gheen ander, o Heere,
Haest dy doch seere.

[fol. 114v]

Ghebedt.

§ O Heere, nademale onse swackheyt so groot is, dat wy niet souden dragen konnen de stryden ende aenuechtinghen onser vianden. Haeste dy ons te hulpe te komen, dat sy gheen oorsake hebben ons te bespotten: mer meer dat wy van hen onslaghen, ons verhueghen in dyner goedigheyt door dynen Sone Iesum Christum Amen.