Psalmen Davidis
(1566)–Jan Utenhove–
Auteursrechtvrijin Nederlandischer sangs-ryme
[Folio 101v]
| |
 End myns klaghens bidden aennemen,
voor de vréese myner party,
Myn leuen behoud end beury.
Uerbergh my doch voor de raedslaghen
Der vyanden die my so plaghen:
End voor dat godloose verbond
Der die booss wercken t’aller stond.
Sy hebben ghewett end ghedronghen,
Euen als een swerd, huere tonghen:
End voor pylen schieten sy wt
Bitter woorden oock ouer luyd.
Op dat sy int verborghen schieten
Den ontschuldighen end vernieten:
Welcken sy te schieten bestaen
Met gheenderley vreese beuaen.
Sy syn koen in huer boos’ anslaghen,
End spreken van stricken end laghen
Daer te legghen den vromen lien,
Segghende, wie sal dit doch sien?
§1 Sy dichten schadelicke dinghen,
End deselu’ onbeschaemt volbringhen,
Wat in’t diepste der herten leyt.
| |
[Folio 102r]
| |
Brenghen sy voor tot schad’ end leydt.
Mer Godt salse ghewislick schieten
Met eenen pyl end doen te nieten
Seer haestelick end onuerdacht,
Eer dat sy daerop nemen acht.
Huer eyghen tongh sal op hen vallen,
End sullen grouwelick veruallen,
So dat hem sal een ieghelick
Uerwondern ouer t’selue stuck.
Dit sullen alle menschen schauwen,
End Gods wonderwercken ontuauwen,
End sullens’ ouerlegghen fyn,
Op dat sy daeraf tuyghen syn.
De vrom’ in God sal hem verblyden,
End in hem hopen t’allen tyden:
End alle die rechthertigh syn,
Sullen hen in hem romen fyn.
| |
Ghebedt.O Heere Godt, na dien dy ghelieft ons te oeffenen door de lasteringhen, die de godloosen alwech erdichten onsen goeden handel ende wandel te beulecken, wy bidden, du willest ons verlossen van alle hueren anslagen, ende sulck een straffe daer ouer doen, dat een ieghelick leere dy vruchten, ende beuen voor dynen rechten oordeelen, ende wy ons verblyden moghen in eewigheyt door dynen Sone Iesum Christum. Amen. |
|
