Psalmen Davidis

in Nederlandischer sangs-ryme

Deus Deus meus, ad te. psal.lxiii.

Dauid tot leeringhe der gheloouighen, verhaelt hoe hy syn toeulucht tot Godt ghenomen hebbe in alle synen verdruckinghen, sich also te troosten ende te verstercken.

O God, myn eewigh God, tot dy,

[fol. 100r]

Mak’ ick my seer vroegh inden morghen,
Myn siel, o Heer, met grooter sorghen,
Is dorstigh, end haeckt na dy vry,
Myn vleesch oock, voor t’ cruyce verslaghen,
Heeft een groot verlanghen na dy,
In’t dorr’ end woest land, daer ick my
Uinde vermoeyt end vol mishaghen,

Op dat ick een mael schauwen magh,
Dyn sterckheyt ende dyn heerlicheyt,

[fol. 100v]

 

Ghelyckerwyss ick, met vroylickheyt,

 

In dyn heylighdom te syn plagh,

 

Want dyn goedicheyt end ghenade

 

Ueel beter dan dat leuen is,

 

Daerom sullen dy louen fris,

 

Myne lippen oock vroegh end spade.

 

 

 

Daerom sal ick lof singhen dy,

 

So langh als ick blyu’ inden leuen,

 

End sal met den handen verheuen

 

Dynen naem hier aenropen vry.

 

Myn siel’ als met march end vetticheyt

 

Werdt veruult end ghesadight fyn,

 

Wanneer ick metten lippen myn

 

Dy lofdanck segghe mit vroeylickheyt:

 

 

 

§1 Ick denck’ in myn slaepkamer vast,

 

End met aendacht op dyn moghentheyt,

 

End in myn waken met danckbaerheyt

 

Ben ick gantslick op dy ghepast,

 

Want du heefst my dickmael byghestaen,

 

In myne nood, dies sal ick nu,

 

Als met dyner vlercken schaduw

 

Bedeckt my oock verhueghen voortaen.

 

 

 

Myn siele dy also hanght an:

 

Dat sy gheensins van dy can scheyden,

 

Du kanst my met dyn recht’ hand leyden

 

Ondersett teghen alle man.

 

Dit volck dat daer soeckt met onureden

 

Myn leuen te verderuen gants,

[fol. 101r]

 

Salmen opentlick sien te hans

 

Dalen inde diepten der erden.

 

 

 

Sy sullen metten swerde fyn

 

In stucken afghehouwen werden,

 

End sullen den vossen der erden

 

Tot eenen roof ghegheuen syn.

 

Mer de Koningk sal hem verblyden,

 

End alle die sweren by hem:

 

Mer verstopt sal syn mond end stem

 

Den, die lieghen sonder vermyden.

Ghebedt.

<h> O goede Godt, na dien het dy ghelieft, ons dyner ghenaden ende segheninghen schatten (daer ons de godloosen van soecken te trecken, ons also mit sich tot den verderue te leyden) in dyner Chemeynte op te doene: doe ons die ghenade, dat wy tsamen gheuoeghet met dynen Sone Iesu Christo, (die dat hoofdt derseluen is) daer inne blyuen moghen in eewigheyt, dy te dienen end dyne goedigheyt te bekennen die ons in hem angeboden ende voorghedraghen werdt. Amen.