Psalmen Davidis

in Nederlandischer sangs-ryme

Magnus dominus et laudabilis. Psalm.xlviii.

Dancket Dauidt Godt voor de stadt Ierusalem die een figure der Ghemeynte is, dat sy seer wonderbaerlicken van eenen seer groten peryckel verlost was: besingt de sterckte ende sekerheyt der Sion, die de Heere verkoren heeft.

Inder melodie des Psal.xlvi.

GOdt is de Heer, ende ghepresen seer
Uan wegen der stadt onses Gyds end Heer

[fol. 78v]

 

Op synen heylghen berghe.

 

De bergh Sion, aen wiens Noordsyde light

 

S’grooten konings stadt, is gaer schoon end dicht

 

Uerurueghende die erde.

 

 

 

Want Godt is in huer palaysen bekent

 

Uoor een vaste burgh, hen altydt ontrent

 

In noodt gaer onbewoghen,

 

Want de koninghen quamen daer versaemt,

 

Wel toegherust seer stout end onbeschaemt,

 

End also voorby toghen.

 

 

 

Sy beschauwdens’ end verwonderden hen,

 

End versloeghen hen totten lesten man,

 

Uliende met vreess beuanghen,

 

Weedom quam hen aen als eener die baert,

 

Als Seeschepen ghebroken inde vaert

 

Door Oostwindt syn verganghen.

 

 

 

Ghelyck wy ghehoort hebben, euen dat

 

Selu’ hebben wy oock ghesien inde stadt

 

Des Heeren der heyrscharen,

 

In ons Gods stadt daer hy syn woonst’ in heeft

 

Welcke beuest heeft Godt die eewigh leeft,

 

End sal s’ eewlick bewaren.

 

 

 

§1 Wy hebben, Heer, op dyn goedtheyt gewacht

 

In midden dyns tempels na hulp ghetracht:

 

End heefst ons by ghestanden,

 

Dyn lof is schoon als dyne naem verbreydt

 

Totter wereldt eynden, vol gherechtheyt

 

Werdt dyn recht’ handt beuonden.

[fol. 79r]

 

Laet verblyden hem den bergh van Sion,

 

Laet verhueghen de dochter Iuda schoon

 

Om dynr oordeelen wille.

 

Omringht Sion end gaetse vast rondom,

 

Op dat ghy siet wat daer is in end om,

 

Telt oock haer torren stille.

 

 

 

Siet met aendacht op haer bolwercken sterck,

 

Op huer’ hooghe palaysen neempt oock merck,

 

Dat ghyse mooght verbreyden

 

Den nakomers: want hy is onse Godt

 

In eewigheyt, die ons oock totter doodt

 

Deghelick kan gheleyden.

Ghebedt.

§ O Godt een eewigh verlosser dyner Gemeynte, die du ons daghelickes so vele baerblyckelicke teekene dyner gunstigheyt bewysest, in dien dat du onse vyanden verschreckest ende huere anslaghen te niete makest: achteruolghe dyne goedtwilligheyt to onswaert, dat wy mit versekerheyt onder dyner heyligher bescherminghe, altydt oorsake hebben, dy danck, eere ende lof te gheuen door dynen lieuen Sone Iesum Christum. Amen.