Psalmen Davidis

in Nederlandischer sangs-ryme

Deus noster refugium. psalml.xlvi.

Dauid singht met vrueghden van Godes stercker ende vaderlicker hulpe: bewyst, hy vertrauwe vast op Godt ende vreest niets des ghenes datter gheschiedt, nademaele godt met hem is. Dese Psalm verweckt oock alle swaeck gheloouighen op God te betrauwen, so wanneer de godloosen woeden ende veruolghen.

GOdt is ons een toeulucht end vaste burgh,
In teghenheyt bystandigh, sonder sorgh,
Dies sullen wy niet schricken.
All waert schoon

[fol. 76r]

dat d’erdryck worde verstelt,
Of de berghen in See neder gheuelt,
Wy souden niet verschricken.

Laet druyschen d’meer end hem verheffen op,
Laet de berghen met hueren hooghen kop,
Hen roeren end beweghen.
De beken schoon aller ghenadigheyt
Sullen Gods stad verhueghen ouer breyd,
End s’Heeren woonst van deghen.

Midden in haer is God, daerom sal sy.
Niet wanckelen: want God sal haer staen by,
Oock voor des morghens stonde,
De volcken syn gheweest in grooten roer,
De rycken syn bewoghen door oproer,
D’erd is ghsmolten in t’ronde.

Mer der heyrscharen Heer is onse sorgh,
De Godt Iacobs is ons een vaste borgh,
In allen teghenheden,

[fol. 76v]

 

Komt doch ende merckt in v seluen aen

 

De wercken groot, die de Heer heeft ghedaen,

 

End syne wonderheden.

 

 

 

Ghenadelick weert hy de kryghen wreed

 

Tot den eynden des gantsen erdrycks breed

 

Den vyanden tot schande.

 

De boghen sterck breeckt hy met grooter spoed,

 

De spiessen scherp maeckt te niet end verdoet

 

De waghens mitten brande.

 

 

 

Staet doch af end my voor dyn God bekent,

 

Die daer groot ben, in den volcken erkent

 

Ouer der gantser erden.

 

Met ons is der heyrscharen Heer end Godt,

 

De God Iacobs sal ons en vaste slot,

 

In noodt beuonden werden.

Ghebedt.

<h> O Godt, een eenighe toevlucht ende sterckte der ghenen die op dy vertrauwen, verseker ons in dyner goedigheyt, end verstroey den raedt ende dat voornemen der godloosen, dat wy in vrede ende gherustheyt des gheestes leuen: dy dienen ende vereeren onse gantse leuen: ende bekennen voor onsen eenighen beschermer ende saligmaker door dynen Sone Iesum Christum. Amen.