Onder den voorbeelde des huywelickes Salomonis met der dochter Pharaos werdt hier beschreuen dat gheestelick huywelick Christi met syner ghemeynte. Osee.ii. Ephe.5
Inder wyse des xxiiii. psalmes.
MY komt te voor een rede goedt
Die wt der herten bersten moet,
Welck’ ick den Koningk wil toeschryuen
Myn tounghe is nu seer wel ghemoedt
Also te dichten metter spoedt,
Als een rasch schryuer konde schryuen,
Du bist de schoonste die daer leeft,
Dynen lippen ghenad’ aenkleeft,
Mits dat dy Godt gants is ghenadigh.
Gordaen dyn swerdt met grooter kracht,
Gheweldigh vorst, so groot gheacht
Saltu syn alom wonderdadigh.
Met spoedt ryd eerlick ouer breydt
Op het woordt der warachtigheyt,
[Folio 74v]
[fol. 74v]
Tot den volken met grooter eeren.
Uerghselschapt met sachtmoedigheyt,
End allerley gherechtigheyt,
Dyn recht’ handt sal dy wonder leeren.
Dyn pylen sullen scherp end hardt
Doorgaen dyner vyanden hert,
De volcken sullen voor dy vallen.
Dyn throon bestaet doch eewelyck,
De staf, o Godt, van dynen ryck,
Is der gherechtheyt staf in allen.
Du heefst lief de gherechtigheyt,
End haetst alderhande boosheyt,
Daerom dat Godt ia bouen allen
Dyne metghesellen heeft dy
Ghesaluet met blyschap oly,
Die op dyn lidmaten moet vallen.
Dyn kleyders welrieckende syn
Na Myrrh’ Alo’ end Cassy fyn,
Wt yuoren-kassen ghenomen:
Om dy alwegh te maecken vro.
De koninghen dochters daertoe
In dynen dienst ghewilligh komen.
§1 Dyn bruydt staedt dy ter rechter handt,
Uerciert met goudt van Ophir gent
Hoor, dochter sie, neygh doch dyn ooren.
Uergheet dyn volck als dreck end stof,
Uergheet dyns vaders huyss end hof,
Kleef hem aen, hem alleen will hooren.
[Folio 75r]
[fol. 75r]
De Koningk sal dyn schoonheyt friss
Belusten, want hy dyn Heer is:
Du salt hem dienen end aenbidden.
De dochter Tyri met gheschinck,
End volcken ryck o wonder dingk,
Sullen oock voor dyn aenschyn bidden.
T’ciersel der Koninghinnen schoon,
Is inwendigh, door s’ Konings doen,
Huer kleed is gheulochten van goude,
Sy sal den Koningk syn toebracht
In kleyderen konstigh ghewracht,
Met maeghden die haer volghen boude
In blyschap end verhueghing groot
Sullen sy, buyten alle nood,
In s’ konings tempel ghebracht werden,
Uoor dyn vaderen sullen dy
Kinders syn, die du stellest vry
Tot vorsten op der gantser erden.
Dyns naems met schryuen wil ick seer,
Ghedachtigh syn, so langs so meer,
Tot allen eewen end gheslachten.
Daerom sullen de volcken dy
Belyden eewelick seer bly,
End dynen naem altyd groot achten.
Ghebedt.
O goede ende almachtige Godt, die du te volbringhen dyne beloftenissen, ons ghesonden hebst, dynen gheliefden Sone onsen Koningk end verlosser, gheef dat wy
[Folio 75v]
[fol. 75v]
ons also schicken ter ghehoorsaemheyt dynes woordes, dat my mit versakinge onses selues ende aller vleeschlicker begheerten, oorsaecke syn moghen dat dyne heylighe name groot-ghemaeckt werde ouer den gantsen erdbodem in den name des seluen dynes lieuen Sones Iesu Christi Amen.
Auteursrechtvrij