Psalmen Davidis

in Nederlandischer sangs-ryme

Dixit iniustus. Psalm.xxxvi.

Dauid verwondert sich ouer de groote goedicheyt Godes, die so verbreyd is, dat huerer oock de godloosen (die hier beschreuen werden) ghewaer werden, ende bidt Godt, hy wilse laten gheduerigh bliiuen totten ghenen die hem kennen, ende dat hyse bewaere teghen dat gheweldt der godloosen, welcker val hy voorsecht.

DE boosheyt der godloosen my,
Betuyght in mynen herten,
Dat gheen Gods vreese by hem sy,
Hy kan gheen goed beherten,
Want hy hem vro,
In d’boos romt so,

[fol. 57v]

Dat men hem gants moet haten.
Daertoe ghewiss,
Niet dan quaed is,
End bedrogh syns monds praten.

Hy wilt gheen leeringh nemen aen,
Om syn leuen te dwinghen,
Hy tracht in syn bedde voortaen,
Snoodigheyt te volbringhen,
End lieft ontslecht
Den wegh onrecht,
Dien hy betreedt van deghen,
Met hert’ end daedt
Haett hy gheen quaedt,
Den goede altydt enteghen.

O Heer, dyn goedigheyt gheraeckt
Oock totten hemel schoone,
End dyn waerheyt de wolcken raeckt
Iae oock des hemels throone.
Dyn gherechtheyt

[fol. 58r]

 

Werdt ouerbreydt.

 

Als Gods berghen gheuonden,

 

Dyn daden fyn

 

Te achten syn

 

Euen als diepe afgronden.

 

 

 

§1 Du behoudst, Heer, seer voorsichtbaer

 

Den mensche end oock de beesten,

 

Ach hoe is dyn goedtheyt kostbaer

 

Den ghenen aldermeesten,

 

Die altydt daer

 

Betrauwen gaer

 

Inde schaduw dynr vlercken.

 

Sy sullen hen

 

Uersadighen

 

In dyns huys oueruloeden.

 

 

 

Du saltse bedrencken ghewis

 

Uan dynr wellusten beken,

 

D’oorsprongk des leuens by dy is,

 

Wy sien klaer (syn ansteken)

 

In dyn licht, Heer,

 

Dyn goedheyt teer,

 

Wend tot den die dy kennen,

 

De ghrechtheyt dyn

 

Wil tot den fyn,

 

Die rechthertigh syn, wennen.

 

 

 

Dat my gheensins ghenaken doch

 

Der houerdighen voeten,

 

Dat der godloosen handen noch

[fol. 58v]

 

My van myn plaetss niet stooten,

 

Die daer boos doen

 

Hoe sterck end koen,

 

Sullen ghewislick vallen.

 

End door anstoot

 

Gheuallen bloot

 

Sullen blyuen veruallen.

Ghebedt.

§ Rechtuerdighe vader, dien de wereldt niet en kent, druck dyne wrese in onse herten, die daer van ons verdryue alle ongherechtigheyt ende lueghene, ende maeck ons bequame tot goeden wercken, op dat wy an dyne voorsichtigheyt hangen, ende hopen onder de schaduwe dyner vlueghelen, ende versaedt werden van der oueruloedigheyt der goeder die du belooft ende bereydt hebst alle den ghenen die du dynen Sone Iesu Christo gegeuen hebst. Amen.