Hier werd grondelicken geleert by Dauids exempel, hoe de mensche, mit syner sonden last beswaert, ter saligheyt ende warachtighen trooste der consciencien gheraken kan.
O wel saligh wiens boosheyt is vergeuen,
End wiens sonden bedeckt syn in dit leuen:
Welsaligh is, wien die Heer niet toeschryft
Syn sond’, end in wiens geest geen bedrogh blyft
Om dat ick dy myn misdaedt heb versweghen
Mits myn roepen, myn beens syn droogh gedegen
[Folio 49v]
[fol. 49v]
Want dyn handt heeft my beswaert dach end nacht
Myn sap is gaer tot somer drooghten bracht.
Mer als ick dy gheopent heb myn sonde,
End niet bedeckt, ia selfs als ick vermontde:
Ick wil den Heer belyden myn misdaedt
Alteghen my, so vergafstu myn quaedt.
Hierom sullen all’ heyligh’ an alle syden
Bidden tot dy, Heer, in bequame tyden:
Also sal hy beurydt syn ouer al
Uoor wateruloedt end allerley misual.
1 Du bist myn burgh, van druck saltu my vryden
Dies sal ick my met lofsank gaer verblyden,
Uerstandt end leer dyns weghs ick gheuen wil
Dy, end dy met myn oogh gheleyden still.
Wilt doch den peerd’ end muyle niet ghelicken
Die gheen verstandt hebben alsoot mach blycken
Mer moeten met een ghebit ghetemt syn.
Op dat sy hen schicken na uwen sin.
Ueel onghelucks sal den godloosen naecken,
Mer die den Heere vertrauwt sal troost smaecken.
Ghy oprechten in den Heer’ v verblydt,
End verghueght v all’ die rechthertigh syt.
Ghebedt.
Barmhertighe Vader, die du niet begheerest den doodt mer meer de bekeeringhe ende dat leuen des sondaers: streck dyne ghenade, goedigheyt ende gerechtigheyt ouer ons, dat alle onse ongherechtigheyden begrauen, ende wy mit dyner goedigheyt omringht, ons in dy ver-
[Folio 50r]
[fol. 50r]
ghueghen moghen: ende wandelen in aller gherechtigheyt, als wy door dynen Sone Iesum Christum gheleert syn. Amen.
Auteursrechtvrij
