Psalmen Davidis

in Nederlandischer sangs-ryme

Exaltabo te. Psalm.xxx.

Dauid danckt Godt, dat hy hem wt doode noodt verlost heeft: ende vermaent alle gheloouighen, dat selue te doene ende te bekennen, door syn exempel hoe sachthertigh dat Godt sy tot den synen. Daerna bidt hy hem, ende belooft syn lof te singhen in eewigheyt. Een bequame Psalm God te prysen na ueruolghinghe.

O Heer, ick wil hoogh prysen dy,
Want du Heefst my verheuen:
End myn vyanden ouer my
Niet vroeylick laten leuen.
Myn

[fol. 45v]

Heer myn Godt, van herten vry
Hebbe ick vast gheroepen tot dy.
Du heefst my heil ghegheuen.

Heer du heefst wederropen fyn,
Myn siele vander helle,
End ghetoghen dat leuen myn
wt der dooden ghestelle,
Singhet den Heere, ghy die bloot
Syn goedheyt bekene, end maeckt groot
Syn heylghe ghedachtnisse.

Want syn torne kortwyligh is,
Mer syn gunst duert seer langhe.
S’auonds komt wel d’weenen, mer frisch
S’morghens vrueghd met gheklanghe.
wanneer ick was in goeder spoed,
So seyde ick in my, wel ghemoedt,
Ick kan niet beweeght werden.

[fol. 46r]

 

1 Du heefst Heer, myn bergh sterck ghemaeckt

 

Na dynen goeden wille,

 

Mer als du barghst dyn aensicht naeckt

 

So ward ick verschrickt stille.

 

Doe riep ick, o Heer dy vast aen,

 

Myn ghebed, myn God, dy ghedaen,

 

Hebbe ick met desen woorden.

 

 

 

Wat nut sal in myn bloed doch syn,

 

So ick in’t graf moet dalen?

 

Sal dat stof dy belyden fyn?

 

Of Dyn trauwe verhalen:

 

Uerhoor my dan, myn God end Heer,

 

Wil my doch ghenadigh syn seer,

 

End my behulpsaem wesen.

 

 

 

Du heefst in groote vrueghd myn leyd

 

My verandert met iueghden:

 

Den sack heefstu my afgheleyt,

 

End my begort met vrueghden:

 

Dies sal dyn eer besonghen syn

 

End niet versweghen, Heer God myn,

 

Danck wil ick dy steets segghen.

Ghebedt.

§ O Godt, verlosser alle der ghenen die dy in huerer teghenspoedt anroepen, verloss ons vander woedicheit onser vianden, ende laet niet toe dat wy in tydt der vorspoedt dyne weldaden missbruycken, mer meer dat wy ons gantzlicken begheuen, dy groot te maecken in eewigheyt door Iesum Christum. Amen.