Psalmen Davidis

in Nederlandischer sangs-ryme

Tribuite Domino. Psalm.xxix.

Dauid beschriift hier de maiesteyt Godes door de blickseme, donders ende ongheweder die de creaturen verschrocken maecken, hoewel hy daerentusschen goedt ende genadigh sy den synen. Een bequame Psalm den Heere te louen wan het dondert.

GHy die daer syt in hoogheyt
Groot in eer’ end’ heerlicheyt,
Gheeft den Heere met andacht
Eer’ end almoghende kracht.

[fol. 44r]

Gheeft eere des Heeren name
Die voor syn maght sy bequame.
Buyght uw knien met aller eere
In t’heylighdom voor den Heere.

Gods stem, dies men verwondert,
Op de wateren dondert,
D’Heer heeft maght te stooten wt
Ueel waters met groot gheluydt.
S’ Heeren stemme gheeft te mercken
Hoe krachtelyck hy kan werken
S’Heeren stemme t’elcker stonden
Werdt vol cierlickheyt beuonden.

S’Heeren stemme met gheweldt
De cederbooms nederuelt.

[fol. 44v]

 

De ceders die daer playsant,

 

Staen, in Libano gheplant,

 

End doet Libanum ontspringhen.

 

Euen als de kaluers springhen.

 

End den bergh Sirion milde,

 

Als iongh’ eenhoorens in’t wilde.

 

 

 

S’ Heeren stem deghelick scheydt

 

De vierulammen ouer breydt,

 

S’Heeren stem de wilderniss

 

Doet beuen ende Cades,

 

S’Heeren stem, door een veruaren,

 

Doet de hindekaluers baren.

 

Sy ondeckt oock harde koene

 

Menighe bosschagyen groene.

 

 

 

Hiertusschen een ieghelick

 

Singht den Heere deghelick,

 

In syn paleys fyn bereydt,

 

Synen lof end’ heerlicheyt.

 

Die Heer sitt, ons ten goeden,

 

Ouer der wateren vloeden.

 

Die Heer sitt om te richten

 

In syn rycke, sonder swichten.

 

 

 

Die Heer gheeft den volcke syn

 

Gheduerighe sterckheyt fyn.

 

D’Heer salt selu’ begrauen vry

 

Met vrede die eewigh sy.

Ghebedt.

O Heere Godt, dien alle eere ende heerlicheyt toekomt

[fol. 45r]

ghelyckerwys het dy ghelieft heeft, ons dynen wille te verstaen doen, gheef oock dat wy denseluen met aller eerwerdigheyt annemen, ende dat wy syne kracht gheuoelen, die ons reformere in een heyligheyt des leuens, op dat wy eyndelicken ghenieten des erues dat daer belooft is alle den ghenen, die du in dynen welgheliefden Sone Iesus Christo angenomen hebst. Amen.