Psalmen Davidis

in Nederlandischer sangs-ryme

Iudica me domine. Psalm.xxvi.

Dauid protesteert van syner goeder consciencie teghen syne vyanden, ende eyghent sich gants tot den dienste Godes: dien bidt hy, hy wil hem bewaren ende erghent oponthouden voor sodan grooter straffe als Godt ouer de godloosen, die verdrucket werden sullen, doen wil. Is een bequame psalm, voor de verdruckte onder de afgodendienaers.

[fol. 39v]

O Heer, hoedt my myn recht,
want ick heb recht end slecht
Ghewandelt hier op der erden:
Ick heb op dy myn hope
Ghesette, dies ick verhope,
Dat ick niet beweeght sal werden.

O Heer, ick bidde dy,
Wil recht beproeuen my,
End my versoecken te deghen.
Myn nieren end ghedachten
Ondersoeck met andachten,
End daertoe alle myn weghen.

[fol. 40r]

 

Want ick heb dyn goedheyt

 

My voor ooghen gheleyd,

 

End wandel’ in dyn waerhede,

 

Ick pleegh my te vermyden

 

Uan lichtuerdighe lieden,

 

End vanden beueynsden mede.

 

 

 

T’gheselscap der boosen,

 

Haet’ ick, met godloosen

 

Ben ick nummermeer gheseten,

 

Ick sal wasschen myn handen

 

Met onschuld, end omranden

 

Dynen autaer onuermeten.

 

 

 

Op dat ick mondelick,

 

Dyn lofkond’, end rycklick

 

Uertell’ all dyn wonderdaden

 

Dyns huyses woningh, Heere,

 

Hebb’ ick lief, end dynr eere

 

Hutt’, daer du toonst dyn ghenaden.

 

 

 

§1 My metten boosen niet

 

Laet vergaen, noch my, mit

 

Den die na bloedsturtingh denken.

 

Die daer hebben voorhanden,

 

Schalckheyt menigherhanden,

 

End de recht’ hand vol gheschencken.

 

 

 

Mer ick wandele vry

 

Met onschuld, verlos my,

 

End wil my gnade bewysen,

 

Myne voet is vast seere.

[fol. 40v]

 

Daerom sal ick den Heere

 

Oock inder ghemeynte prysen.

Ghebedt.

§ Heere Godt, die du niet begherest, dan de weluaert ende saligheyt der ghenen die op dy verhopen, streck wt dyne groote barmhertigheyt ouer dyne aerme creaturen, ende wisch wt alle onse ongherechtigheyden, op dat wy onderrichtet door dynen heylighen gheest, wandelen in dynen heylighen gheboden, sonder eenigh afdwalen, end endelicken ghenieten de saligheyt, die ons verworuen is door dynen Sone onsen Herre Iesum Christum. Amen.