Dauid na dien hy wel wiste dat de Tempel ghebauwt soude werden op den bergh Moria, singhet wt de groote goedtheyt Gods tot den Israeliten, waer onder hy eygentlicken een plaetse voor sich verkoos, hoe wel hem dat gantse erdtriicke toequam.
D’Eerdtryck komt toe den Heer’ alleyn
[Folio 36v]
[fol. 36v]
Die gantse wyreldt in’t ghemeyn.
End die daer in ouer breydt woonen.
Hy heefts’ op d’ Meer sterk gegrondiert.
Uerryckt end lustelic verciert
Met menigherley waterstromen.
Wie sal komen op s’Heeren bergh,
End’ op de plaets, die sonder ergh
Gants heyligh is end sonder vlecken?
Die daer handen end hert’ heeft reyn,
Met ydelheyt niets heeft ghemeyn,
Hem met valsch’ eedt niet wilt beulecken
Sulck een sal vanden Heer voortaen
Seghenyngh end ghenad’ ontfaen,
Uan Godt die hem wilt salighmaken,
Dit is t’gheslacht dat hem met vliet
[Folio 37r]
[fol. 37r]
Soeckt, end begheert doch anders niet,
Dan tot syn anschyn te gheraken.
Heft op uw’ hoofden poorten groot,
Eewighe doren heft v bloot,
Ingaen sal de Koningk vol eeren,
Wie is die Koningk sulcker eer?
Het is een ouerweldigh Heer,
Door kryghshandel vol aller eeren.
Heft op uw’ hoofden poorten groot,
Eewighe doren heft v bloot,
Ingaen sal de Koningh vol eeren,
Wie is die Koningk sulcker eer?
Het is der heyrscharen die Heer,
Een Koningk vol allerley eeren
Ghebedt.
§ O Godt, Heere ende heerscher der gantser wereldt, wil door dyne heylighe genade wonen midden onder ons, ende ons deelachtich maken alle dyner hemelschen gauen, dat wy versterckt met dyner kracht, victorie bekomen moghen teghen alle onse vyanden, door dynen Sone Iesum Christum. Amen.
Auteursrechtvrij
