Psalmen Davidis

in Nederlandischer sangs-ryme

Exaudiat te Dominus. Psalm.xx.

Dat volck siende synen Koningk Dauid wttrecken tot eenen periculosen krych, roept Godt aen: daerna versekert edt sich selues vander ouerwinninghe. Een Psalm bequame voor de Ghemeynte, wanneer sy bespronghen werdt van ongheloouighen Princen.

DIe Heer verhoore dy van deghen
In dyner teghenheyt,
De naem Gods Iacobs alle weghen
Dy stell’ in sekerheyt,
Uan syn heylghe plaets’ in dyn klaghen,
Hy komme

[fol. 29v]

dy te stade,
Wt Sion na dynen behaghen
Hy doe dy hulp’ wt gnade.

Oock dyner offerdiensten alle
Hy will’ andachtigh syn,
End dyn brandtoffer vet te male
Keeren in asschen fyn.
Hy gheue dy rechtsins te maken
Na den heysch dynes herten,
End volbrenghe alle dyn saken
Na dynes raeds begheerten.

Wy sullen ons hooglick verhoghen
In dyn victory schoon,
End’ onse banieren verhooghen
In onses Godes naem.
Want die Heere sal huysch volbringhen
Wt louter goedigheyde
Al dyn begheerte: dies wy singhen,
End seggen met bescheyde.

Nu verstaen wy dat Godt met machte
Syn Koningk heeft bewaert,
End’ heeft hem met syns arems krachte

[fol. 30r]

 

Uanden hemel verhoort.

 

Onse vyanden hen vertrauwden

 

Op waghens ende peerden,

 

Mer wy onss Godes naems vol trauwen

 

Ghedachteniss anueerden.

 

 

 

Sy syn vergaen end onderbleuen

 

Met heur’ houeerdigheyt,

 

Mer wy syn schoon staende ghebleuen

 

In meerder vasticheyt.

 

O Heere Godt wil onderhouden

 

Den Koningk in dat leuen,

 

End als wy met bidden anhouden

 

Wil ons doch ghehoor gheuen.

Ghebedt.

§ O Godt eenich Heere ende herscher der gantser wereldt, die du ons gheboden hebst gehoorsaem te syne den ghenen die du ouer ons ghestelt hebst, wil dyne ghenade ende seghen strecken ouer den Koningk ende all Ouerheyden, dat sy onder dyner vreese ende bescherminge leuen, ende ouerwinnen huere vyanden: ende wy onder hen leuen in goeden vrede, dy te prysen alle onse leuen lanck door Iesum Christum. Amen.