Psalmen Davidis

in Nederlandischer sangs-ryme

Conserua me domine. Psalm.xvi

Dauid begheert hulp van Godt, bringt voordt syn ghelooue ende niet syn wercken die hy niets bekent te syne voor Godt: ende houdt voor, hy hate alle afgoderie ende kleue Gode an, so verseekert dat syn ghebedt verhoort is, dat hy Godt daer voor danket ende set sich gewisse voor, hy wil hem niet alleene hier van dancken, mer oock noch van een meerder ghelucksaemheyt na den doodt, door de kracht der opstandinghe Messie, die hy opentlicken hier voorsegt also dat wtgheleyt werdt. Ac.2. Het is een psalm waerinne voorghehouden werdt een wyse ende forme van bidden voor de gheloouighen die daer quellen in desen leuen.

NEem my, O Heere end God, in dyn behoedt
Want in dy is gheleghen myn vertrauwen.

[fol. 21r]

Myn siel, seg den Heere met goeden moedt:
Du bist myn Heer vol goedigheyt end trauwen
Daerom behoufst du myner wercken gheene,
Want alle maght end dueght heefstu alleene.

Tot den heylghen end die naemaftigh syn
Op erden, heb ick eenen lust ghekreghen,
Mer ouer den komme straff’ end ghepyn,
Die daer gaen tot afgoden end byweghen,
Ick wil hueren bloedoffer niet ghenaken,
End’ huer namen niet nemen inde kaken.

Godt is d’ lot myns deels end des bekers myn
Du bist, O Heer, myn erfdeel wtghemeten,
Dat my voorwaer is toegheeyghent fyn,

[fol. 21v]

 

In een so schoon plaetss als menckan gheweten

 

Ia t’schoonste deel dat daer was onder allen,

 

Dat is my tot mynen deele gheuallen.

 

 

 

§1 Ick sal den Heer dancken, dat hy my so

 

Beraden heeft om dese saeck t’anmercken,

 

Ia myn nieren vought hy des nachts also,

 

Dat sy my niet hinderen t’goedt te wercken:

 

Ick heb my den Heer steets ghestelt voor ooghen

 

Hy houd my (ter recht’ hand staed’) onbewogen

 

 

 

Daerom ghewiss myn hert’ is seer verblydt,

 

Myn tongh’ is vro, ia myn vleesch is in rusten,

 

Wetende dat du niet t’eenigher tydt,

 

Myn siele salt in’t graf laten berusten,

 

Du salt oock gheenderley wyse ghehenghen

 

Dat rottingh’ an dyn heylghen haer sal mengen.

 

 

 

Mer du salt, Heer, my anwysen den pad

 

Die my tot den rechten leuen gheleyde,

 

Want daer is gheen vrueghd die kan maken sat

 

Dan d’aensien dyns anschyns daer ick op beyde,

 

In dyn rechter handt syn oock alle iueghden

 

In eewigheyt, end alderhande vrueghden.

Ghebedt.

§ Heere Godt, die du bist onse schildt ende oueruloedighe loon, nademale het dy ghelieft heeft ons te roepen tot den gheselschappe der ghenen die du verordent hebst ter salicheyt, gheef ons een herte vrymoedelicken te mysprysen ia te verfoyen alle gheselschap der ongeloouigen ende afgodendienaren, ende dat wy ons aenstel-

[fol. 22r]

len ter grootmakingde dynes heylighen names. Op dat wy onder dyner bescherminghe leuende, meer end meer versekert werden vanden ghelucksaligen leuen, dat du alle den dynen bereydt hebst door Iesum Christum dynen Sone, Amen.