Psalmen Davidis

in Nederlandischer sangs-ryme

Dixit insipiens. Psalm.xiiii.

Seght Dauid, Edt sy al vol onghelouinghen ende verachters Godes, beschriift hueren val, ende hoe dat volck Gods van hen verslonden, verlosset sal werden.

D’Erge dwaes seit in syn hert’ end gemoed
Dat God niet is, hy wilt hem niet bedwinghen
Uan schendery’ end grouwelicke dinghen,
Daer is niemand die daer staet na dat goed,
Of

[fol. 19r]

t’ selue doet.

Die Heer’ heeft afghesien met aller vliet,
Uanden hemel op aller menschen wesen,
Of hy sagh’ een die verstandigh moght wesen,
Of die Godt alleene dient end ontsiet,
End’ andern niet.

Mer syn afgheweken alle ghemeen,
Uanden rechten pad tot grouwlicke weghen:
En syn alle vol schendery bedeghen,
Ock die daer eenigh goed doet isser gheen,
Ia oock niet een.

Hoe hebben sy gantselick gheen verstand
Alle de godloos’ end boosdaders snoode?
Sy vereten myn volck ghelick den broode:
Sy anroepen den Heere in gheenen stand,
An elcken kant.

Sy sullen van vreese verslaghen syn,
Want Godt sal syn int’ gheslacht der gherechten:
Ghy beschaemt des bedrucken raed t’onrechten
Om dat die Heere is syn hope fyn,
Sonder waenschyn.

Wie sal den Israel in syn ghequel,
Saligheyt wt Sion gunstigh anbringhen?
Als God sal syn gheuanghen volck wt bringhen,
Beyde sal Iacob wesen vroeylick wel,
End Israel.

[fol. 19v]

Ghebedt.

O Godt die du alleene gherechtich bist ende volkommen, nademale het dy ghelieft heeft, ons te trecken vander veruloeckter schenderye, daermede dat gantse menschelicke gheslachte ontreynighet is, ende ons te verlossen vander slauernye der sonde: geef dat wy wandelen in aller eenuoldigheyt ende godsaligheyt, ende eyndelinghen ghenieten de vrucht der verlossinghe, die du ons door de offerandt des lyues dynes Soons Iesu Christi ghedaen hebst. Amen.