Psalmen Davidis

in Nederlandischer sangs-ryme

Vsquequo Domine. Psalm.xiii.

Dauid in wterlicker benautheyt syner vyanden haluen, beklaeght sich voor den Heere, ende begheert een vrolike verlossinghe.

HOe langh vergheetstu mynr o Heer
Hoe langh’ sal tu noch verberghen.
Dyn aenghesicht voor my so seer,
Hoe langh sal ick

[fol. 18r]

myn siel terghen,
Met ydel sorgh’ end moeylickheyt
Die my daghlicks droefheyt end leydt
In mynen herte berghen?

Hoe langh sal myn vyandt noch syn
Myn verwinner my tot schanden?
Sie my aen, o Heer end Godt myn,
Gheef my antwoorde voor handen,
Uerlicht myn oghen inder noodt
Dat ick niet ontslap’ inden doot,
End kom’ in s’vyands banden.

Op dat myn vyandt segghe niet,
Ick hebb’ hem schoon ouerwonnen,
End dat so my daer vallen siet
Myn party, niet werd’ ontspronghen,
Mer ick stuen’ op dyn goedicheyt,
Uro ouer dyn by standigheyt
Danck Godt werdt van my ghsonghen,

Ghebedt.

[fol. 18v]

O eewighe Godt, die du leuendigh maeckst dat doodt is, gheef ons door dyne oneyndelicke goedicheyt verlichtinghe, dat wy onder den swaren last der verdruckingen die ouer ons kommen, niet versmachten: maeck dat onse consciencie sich altyt verhueghe in dyner salicheyt: ende dat wy ons begheuen dynen name voor eewelick groot te maken, door Iesum Christum onsen Salichmaker. Amen.