Psalmen Davidis

in Nederlandischer sangs-ryme

In Domino confido. Psalm.xi.

Dauid beklaeght sich vanden genen die hem veriaeghden wt den gantsen lande Israels: gheeft te kennen dat vertrauwen dat hy op Godt hadde

NA dat ic my op den Heere vertrauwe
Hoe kompt dat ghy tot myner siele seght?
Uliegh van uwen bergh’ wt desen onrauwe
Als een voghel, dat du maghst rusten slecht,
Want sie, de boose hebben hueren boogh ghspannen

[fol. 16r]

End’ huer pylen an de pese gheleght,
In t’ duyster te schieten d’oprechte mannen.

Mer men salse seer haestelick sien sneuen,
Daertoe al huer voornemen sien vergaen,
Wat heeft doch de gherechtighe bedreuen?
De Heer is in syn paleys wel ghedaen,
End eerlick gheseten op synen throone,
Uan waer syn ooghen alles ouerslaen,
Ende ondersoecken s’menschen kinders koene.

Die Heere aensiet end beproeft den gerechten,
Mer den godloosen, end die daer gheweldt
Lief hebben, die haet syn siele te rechten,
Hy sal op de godloos’ alre ghemeldt
Reghenen stricken, vyer met sulpherbrande,
Daer toe vyerigen windt gaer onghestelt,
Dit werdt het lot huers drinkbekers met schande

Want Godt is gherechtigh dies lieft hy seere
De gherechtheden, keerende d’anschyn
Tot den oprechtighen wt gunsten teere.

Ghebedt.

O Heere, die du bist de sterckte alle der ghenen die op

[fol. 16v]

dy verhopen, nademale ons de weereld laghen lecht van allen syden, ende dat daer gheen middel is deselue te ontgaene dan door dyne ghenade alleene: gheef dat wy volherden in dyner vreese ende waerheyt. Op dat wy niet vermenghet werden in dyner wrake ende straffe die du doen werst ouer de goddeloosen, wan du senden werst den grooten rechter der gantser weereldt Iesum Christum dynen Sone onsen Salighmaker. Amen.